ఏలూరు కార్పొరేషన్‌ ఎన్నికల ఓట్ల లెక్కింపుకు ఏపీ హైకోర్టు అనుమతి

May 7, 2021

పశ్చిమగోదావరి జిల్లాలోని ఏలూరు కార్పొరేషన్‌ ఎన్నికల ఫలితాలు వెల్లడించేందుకు హైకోర్టు గ్రీన్‌ సిగ్నల్‌ ఇచ్చింది. ప్రస్తుత పరిస్థితుల దృష్ట్యా కరోనా నిబంధనలు పాటిస్తూ ఓట్ల లెక్కింపు పక్రియ చేపట్టేందుకు కోర్టు అనుమతి ఇచ్చింది. ఏపీలో మున్సిపల్‌ ఎన్నికల్లో భాగంగా మార్చి 10న ఏలూరు కార్పొరేషన్ లో పోలింగ్ జరిగిన సంగతి తెలిసిందే. పోలింగ్ కు ముందు ఏలూరు కార్పొరేషన్ కు సంబంధించి ఓటర్ల జాబితా, వార్డుల పునర్విభజన అంశాలపై దాఖలైన పిటిషన్లపై విచారణ జరిపిన హైకోర్టు ఎన్నికలు నిర్వహించుకోవచ్చని, అయితే ఫలితాలు మాత్రం వెల్లడించవద్దని స్పష్టం చేసింది. తాజాగా ఈ అంశంపై కోర్టు మరోసారి విచారణ చేపట్టి ఓట్ల లెక్కింపు పక్రియ చేపట్టవచ్చని తీర్పు ఇచ్చింది.