పుట్టినరోజున కలవడంపై అభిమానులకు నందమూరి బాలకృష్ణ విజ్ఞప్తి

June 8, 2021

ప్రస్తుత కరోనా పరిస్థితుల నేపథ్యంలో జూన్ 10న తన పుట్టినరోజు సందర్భంగా కలిసేందుకు రావొద్దని ప్రముఖ అగ్రనటుడు నందమూరి బాలకృష్ణ తన అభిమానులకు విజ్ఞప్తి చేశారు. ఈ మేరకు ఆయన ఒక ప్రకటన విడుదల చేశారు. “నా ప్రాణ సమానులైన అభిమానులకు, ప్రతిఏటా జూన్ 10 వతేదీ నాపుట్టినరోజునాడు నన్ను కలిసేందుకు నలుదిక్కులనుండీ తరలివస్తున్న మీ అభిమానానికి సర్వదా విధేయుడ్ని. కానీ కరోనా విలయతాండవం చేస్తున్న ఈ విపత్కర పరిస్థితుల్లో మీరు రావటం అభిలషణీయం కాదు, నన్నింతటివాడ్ని చేసింది మీఅభిమానం, ఒక్క అభిమాని దూరమైనా నేను భరించలేను. మీ అభిమానాన్ని మించిన ఆశీస్సు లేదు. మీ ఆరోగ్యాన్ని మించిన శుభాకాంక్ష లేదు. మీ కుటుంబంతో మీరు ఆనందంగా గడపటమే నా జన్మదినవేడుక. దయచేసి రావద్దని మరీ మరీ తెలియజేస్తూ, ఈ విపత్కాలంలో అసువులు బాసిన నా అభిమానులకూ, కార్యకర్తలకూ, అభాగ్యులందరికీ నివాళులర్పిస్తున్నాను” అని బాలకృష్ణ పేర్కొన్నారు.