ఆంధ్రప్రదేశ్‌లోని అనంతపురం జిల్లా రాప్తాడులో ప్రభుత్వ పాఠశాలలో విద్యార్థినులపై చైన్‌సాతో దారుణంగా దాడి చేసి పరారైన ప్రధాన నిందితుడు హేమంత్ (21) ఉదంతంలో పోలీసులు కీలక చర్యలు తీసుకున్నారు. నిందితుడిని పట్టుకునేందుకు గాలింపు చేపట్టిన పోలీసుల బృందంపై అతడు కత్తితో దాడి చేయడానికి యత్నించడంతో పాటు రాళ్లు రువ్వడంతో.. ఆత్మరక్షణార్థం పోలీసులు జరిపిన కాల్పుల్లో హేమంత్ తీవ్రంగా గాయపడ్డాడు.
అనంతపురం జిల్లా ఆత్మకూరు అడవుల్లో తలదాచుకున్న నిందితుడి ఆచూకీ తెలుసుకున్న 15 ప్రత్యేక పోలీసు బృందాలు గాలింపు చర్యలు చేపట్టాయి. అటవీ ప్రాంతంలో కూంబింగ్ నిర్వహిస్తున్న సమయంలో పోలీసులకు చిక్కిన నిందితుడు లొంగిపోకుండా తప్పించుకునే ప్రయత్నం చేశాడు. పోలీసులు గాలిలోకి హెచ్చరిక కాల్పులు జరిపినప్పటికీ వినకుండా, తన వద్ద ఉన్న కత్తితో సిఐ వెంకటేశ్వర్లుతో పాటు పలువురు పోలీసు సిబ్బందిపై దాడి చేసి గాయపరిచాడు.
ఈ క్రమంలో ప్రాణాపాయ పరిస్థితి తలెత్తడంతో పోలీసులు ఆత్మరక్షణ కోసం ఆరు రౌండ్ల కాల్పులు జరిపారు. ఈ కాల్పుల్లో తీవ్రంగా గాయపడిన హేమంత్‌ను పోలీసులు వెంటనే అదుపులోకి తీసుకుని, అత్యున్నత భద్రత నడుమ చికిత్స నిమిత్తం అనంతపురం ప్రభుత్వ సర్వజన ఆసుపత్రికి (GGH) తరలించారు.
కాగా, అంతకుముందు శనివారం ఉదయం రాప్తాడులోని జడ్పీ ఉన్నత పాఠశాలలోకి చైన్‌సాతో ప్రవేశించిన నిందితుడు హేమంత్ పదవ తరగతి చదువుతున్న విద్యార్థినిపై, ఆమెను కాపాడబోయిన మరో తోటి విద్యార్థినిపై విచక్షణారహితంగా దాడి చేసి పరారైన విషయం తెలిసిందే. ఈ ఘటనపై తీవ్రంగా స్పందించిన పోలీసులు ముమ్మర గాలింపు చేపట్టి నిందితుడిని ఎన్‌కౌంటర్‌లో పట్టుకున్నారు.
