మహిళల ఆసియా కప్ 2026 టోర్నీకి భారత జట్టును భారత క్రికెట్ నియంత్రణ మండలి (బీసీసీఐ) అధికారికంగా ప్రకటించింది. అమితా శర్మ నేతృత్వంలోని మహిళల సెలక్షన్ కమిటీ 15 మంది సభ్యులతో కూడిన జట్టును ఎంపిక చేసింది. అనుభవజ్ఞురాలైన హర్మన్ప్రీత్ కౌర్కు కెప్టెన్సీ బాధ్యతలు అప్పగించగా, స్టార్ ఓపెనర్ స్మృతి మంధానను వైస్ కెప్టెన్గా నియమించింది.
ఇంగ్లండ్తో లార్డ్స్ వేదికగా జరిగిన ఏకైక టెస్టు మ్యాచ్ అనంతరం భారత మహిళల జట్టు పాల్గొంటున్న తొలి అంతర్జాతీయ టోర్నీ ఇదే కావడం విశేషం. ఆసియా కప్లో మరోసారి టైటిల్ గెలిచి ఖండస్థాయి ఆధిపత్యాన్ని కొనసాగించాలనే లక్ష్యంతో భారత జట్టు బరిలోకి దిగుతోంది.
త్వరలో టోర్నీ షెడ్యూల్
మహిళల ఆసియా కప్ 2026 ఆగస్టు చివరి వారంలో ప్రారంభమై సెప్టెంబర్ మధ్య వరకు జరిగే అవకాశముంది. అయితే మ్యాచ్ల షెడ్యూల్, వేదికలు, తేదీలను ఆసియా క్రికెట్ కౌన్సిల్ (ACC) త్వరలో అధికారికంగా ప్రకటించనుంది.
ఐదుగురు రిజర్వ్ ప్లేయర్లకు అవకాశం
టోర్నీ సందర్భంగా గాయాలు లేదా ఇతర అత్యవసర పరిస్థితులను దృష్టిలో ఉంచుకుని సెలక్షన్ కమిటీ ఐదుగురు రిజర్వ్ ఆటగాళ్లను కూడా ఎంపిక చేసింది. అవసరమైతే వీరిని ప్రధాన జట్టులోకి తీసుకునే అవకాశం ఉంటుంది.
శ్రేయాంక పాటిల్కు చోటు దక్కలేదు
టీ20 ప్రపంచకప్ 2026 జట్టులో చోటు దక్కిన యువ స్పిన్నర్ శ్రేయాంక పాటిల్కు ఈసారి ఆసియా కప్ జట్టులో అవకాశం లభించలేదు. ఆమె స్థానంలో ప్రపంచకప్లో చోటు దక్కించుకున్న ప్రేమా రావత్పై సెలెక్టర్లు మరోసారి నమ్మకం ఉంచారు. దీంతో ప్రేమా వరుసగా రెండో ప్రధాన టోర్నీలో భారత జట్టుకు ప్రాతినిధ్యం వహించనుంది.
హర్మన్ప్రీత్పై భారీ అంచనాలు
37 ఏళ్ల హర్మన్ప్రీత్ కౌర్కు ఆసియా కప్లో అద్భుతమైన రికార్డు ఉంది. ఆమె నాయకత్వంలో భారత్ 2016, 2022 ఆసియా కప్ టైటిళ్లను కైవసం చేసుకుంది. అంతేకాదు, 2012లో విజేత జట్టులో సభ్యురాలిగా కూడా నిలిచింది.
సుదీర్ఘ అంతర్జాతీయ కెరీర్ చివరి దశకు చేరుకుంటున్న హర్మన్ప్రీత్.. మరోసారి ఆసియా కప్ ట్రోఫీని అందించి తన కెరీర్ను మరింత ఘనంగా మలచాలనే లక్ష్యంతో బరిలోకి దిగుతోంది.
బ్యాటింగ్, బౌలింగ్లో సమతూకం
ఈసారి భారత జట్టులో అనుభవం, యువ ప్రతిభకు సమాన ప్రాధాన్యం ఇచ్చారు. స్మృతి మంధాన, షెఫాలీ వర్మ, జెమిమా రోడ్రిగ్స్ వంటి స్టార్ బ్యాటర్లు ఉండగా.. దీప్తి శర్మ, రాధా యాదవ్, రేణుకా ఠాకూర్, అరుంధతి రెడ్డి వంటి బౌలర్లు జట్టుకు బలంగా నిలవనున్నారు. వికెట్ కీపర్లుగా రీచా ఘోష్, జి. కమలిని ఎంపికయ్యారు.
భారత మహిళల జట్టు
- హర్మన్ప్రీత్ కౌర్ (కెప్టెన్)
- స్మృతి మంధాన (వైస్ కెప్టెన్)
- షెఫాలీ వర్మ
- జెమిమా రోడ్రిగ్స్
- భారతి ఫుల్మాలి
- దీప్తి శర్మ
- రీచా ఘోష్ (వికెట్ కీపర్)
- జి. కమలిని (వికెట్ కీపర్)
- అరుంధతి రెడ్డి
- ప్రేమా రావత్
- రాధా యాదవ్
- శ్రీ చరణి
- రేణుకా ఠాకూర్
- నందిని శర్మ
- క్రాంతి గౌడ్
రిజర్వ్ ప్లేయర్లు
- ప్రతీకా రావల్
- ఉమా ఛెత్రి (వికెట్ కీపర్)
- వైష్ణవి శర్మ
- సాయలీ సత్ఘారే
- మిన్ను మణి
