నేటి నుంచే వరల్డ్ సాకర్ సంగ్రామం.. తొలి మ్యాచ్‌లో దక్షిణాఫ్రికాతో మెక్సికో ఢీ

ప్రపంచవ్యాప్తంగా కోట్ల మంది క్రీడాభిమానులు అత్యంత ఆసక్తిగా ఎదురుచూస్తున్న అత్యున్నత సాకర్ సమరం ‘ఫిఫా ప్రపంచకప్ – 2026’ (FIFA World Cup 2026) నేటి నుంచే అధికారికంగా ప్రారంభం కానుంది. అపరిమిత వినోదానికి గ్యారంటీ ఇస్తూ, సరికొత్త రికార్డులతో అలరించడానికి విశ్వ సాకర్ పండుగ సిద్ధమైంది. చరిత్రలోనే తొలిసారిగా అమెరికా, మెక్సికో మరియు కెనడా దేశాలు ఉమ్మడిగా ఈ మెగా టోర్నీకి ఆతిథ్యమిస్తున్నాయి. నెలన్నర రోజుల పాటు సాగనున్న ఈ సుదీర్ఘ టోర్నీలో మొత్తం 48 ప్రపంచ దేశాల జట్లు ప్రతిష్టాత్మకమైన ట్రోఫీ కోసం కసిగా పోరాడనున్నాయి.

మెక్సికో సిటీలో ఘనంగా ఆరంభం – షకీరా స్పెషల్ అట్రాక్షన్

భారత కాలమానం ప్రకారం గురువారం (జూన్ 11) రాత్రి 10.30 గంటలకు మెక్సికోలోని మెక్సికో సిటీ వేదికగా ఫిఫా ప్రపంచకప్ ఆరంభ వేడుకలు అత్యంత వైభవంగా జరగనున్నాయి. ఈ ప్రారంభోత్సవ వేడుకల్లో ప్రపంచ ప్రసిద్ధ పాప్ సింగర్ షకీరా తన ప్రదర్శనతో ప్రధాన ఆకర్షణగా నిలవనుంది. దీంతో పాటు కెనడాలో జరిగే ప్రారంభోత్సవంలో బాలీవుడ్ ప్రముఖ నటి, డ్యాన్సర్ నోరా ఫతేహి కూడా ప్రత్యేకంగా ఆడిపాడనుంది.

ఆరంభ వేడుకల అనంతరం గురువారం అర్ధరాత్రి 12.30 గంటలకు (గ్రూప్-ఎ) జరిగే చారిత్రాత్మక తొలి మ్యాచ్‌లో దక్షిణాఫ్రికాతో ఆతిథ్య మెక్సికో జట్టు తలపడనుంది. అదే గ్రూప్‌లో శుక్రవారం ఉదయం 7.30 గంటలకు జరిగే మరో మ్యాచ్‌లో దక్షిణ కొరియా, చెకియా జట్లు ఢీకొనబోతున్నాయి. ఈ టోర్నీ మ్యాచ్‌లు యునైట్ 8 స్పోర్ట్స్ నెట్‌వర్క్ (United 8 Sports Network) ఛానళ్లలో మరియు జీ5 (Zee5) ఓటీటీ యాప్‌లో ప్రత్యక్ష ప్రసారం కానున్నాయి.

మూడు దేశాల్లో 16 నగరాలు – అమెరికాలోనే మెజారిటీ మ్యాచ్‌లు

• నగరాల వివరాలు: ఈ మెగా టోర్నీ మూడు దేశాల్లోని మొత్తం 16 నగరాలలో జరగనుంది. కెనడాలో టొరంటో, వాంకోవర్.. మెక్సికోలో గ్వదలహార, మెక్సికోసిటీ, మాంటెరీ నగరాలు ఆతిథ్యమిస్తుండగా.. అమెరికాలో అట్లాంటా, బోస్టన్, డల్లాస్, హ్యూస్టన్, కన్సాస్ సిటీ, లాస్ ఏంజెలెస్, మయామి, న్యూయార్క్ న్యూజెర్సీ, ఫిలడెల్ఫియా, సియాటిల్ మరియు శాన్ ఫ్రాన్సిస్కో నగరాలు వేదికలుగా మారాయి.

• మ్యాచ్‌ల వివరాలు: మొత్తం మ్యాచ్‌లలో అత్యధికంగా 78 మ్యాచ్‌లకు అగ్రరాజ్యం అమెరికా ఆతిథ్యమివ్వనుండగా.. కెనడా, మెక్సికో దేశాలకు చెరో 13 మ్యాచ్‌లు కేటాయించారు. టోర్నీలో అత్యంత కీలకమైన క్వార్టర్స్, సెమీఫైనల్స్ మరియు గ్రాండ్ ఫైనల్ మ్యాచ్‌లు అమెరికాలోనే నిర్వహించనున్నారు.

మెస్సి, రొనాల్డోల ఆరో ప్రపంచకప్ – ఫేవరెట్లుగా స్పెయిన్, ఫ్రాన్స్

సమకాలీన ఫుట్‌బాల్ దిగ్గజాలు అర్జెంటీనా స్టార్ లియోనెల్ మెస్సి, పోర్చుగల్ వీరుడు క్రిస్టియానో రొనాల్డో మరియు మెక్సికోకు చెందిన గిలెర్మో ఒచా రికార్డు స్థాయిలో తమ ఆరో ప్రపంచకప్‌లో బరిలోకి దిగుతుండటం విశేషం. డిఫెండింగ్ ఛాంపియన్‌గా మెస్సి నేతృత్వంలోని అర్జెంటీనా బరిలోకి దిగుతుండగా, కప్పు కల నెరవేర్చుకోవాలనే పట్టుదలతో రొనాల్డో ఉన్నాడు.

ఈ సీజన్ టోర్నీలో వరల్డ్ నంబర్ 2 స్పెయిన్ జట్టు మరియు ఎంబాపె, డెంబెలె వంటి స్టార్ ప్లేయర్లతో ఉన్న ఫ్రాన్స్ జట్లు హాట్ ఫేవరెట్లుగా బరిలోకి దిగుతున్నాయి. ముఖ్యంగా 18 ఏళ్ల స్పెయిన్ యువ సంచలనం లామిన్ యమాల్‌పై భారీ అంచనాలు ఉన్నాయి. బ్రెజిల్, ఇంగ్లాండ్ జట్లు కూడా టైటిల్ రేసులో గట్టి పోటీనిస్తున్నాయి.

మరోవైపు నార్వే, మొరాకో, జపాన్ వంటి జట్లు సంచలనాలు సృష్టించడానికి సిద్ధంగా ఉన్నాయి. ఈసారి కేప్ వెర్డ్, కురసావ్, జోర్డాన్, ఉజ్బెకిస్థాన్ దేశాలు తమ చరిత్రలోనే తొలిసారిగా ఫిఫా ప్రపంచకప్ ఆడబోతున్నాయి. మొత్తం 12 గ్రూపులుగా సాగే ఈ టోర్నీలో 1248 మంది ఆటగాళ్లు తమ అదృష్టాన్ని పరీక్షించుకోనున్నారు.