లార్డ్స్‌ టెస్టులో భారత్ జట్టు సంచలన విజయం, సిరీస్‌లో 1-0 ఆధిక్యం

August 17, 2021

భారత్, ఇంగ్లాండ్ జట్ల మధ్య లండన్ లోని లార్డ్స్‌ స్టేడియంలో జరిగిన రెండో టెస్టులో భారత్ జట్టు 151 పరుగుల తేడాతో సంచలన విజయం సాధించింది. దీంతో 5 టెస్టుల సిరీస్‌ లో భారత్ 1-0 ఆధిక్యంలోకి దూసుకెళ్లింది. తోలి ఇన్నింగ్స్ లో కేఎల్‌ రాహుల్‌ సెంచరీ, రోహిత్‌ శర్మ కీలక ప్రదర్శన, రెండో ఇన్నింగ్స్ లో మహమ్మద్ షమి, బుమ్రా బ్యాటింగ్ పోరాటం, భారత్ బౌలర్ల మెరుపులు…ఇలా ఆల్ రౌండ్ పెరఫార్మన్స్ తో లార్డ్స్‌ టెస్టులో భారత్ జట్టు చిరస్మరణీయ విజయాన్ని నమోదు చేసింది. చివరిరోజు మెరుగైన ప్రదర్శనతో అద్భుత విజయం దక్కడంతో భారత్ ఆటగాళ్లు సంబరాల్లో మునిగిపోయారు.

ముందుగా 181/6 వద్ద ఐదో రోజు రెండో ఇన్నింగ్స్‌ కొనసాగించిన భారత్ జట్టు 298/8 పరుగుల వద్ద డిక్లేర్ చేసింది. రెండో ఇన్నింగ్స్‌ లో భారత్ బౌలర్లు మహమ్మద్ షమి (56 నాటౌట్‌: 70 బంతుల్లో 6×4, 1×6), బుమ్రా (34 నాటౌట్‌: 64 బంతుల్లో 3×4) బ్యాటింగ్ పోరాటం ఈ మ్యాచ్ ను పూర్తిగా భారత్ వైపు తిప్పింది. షమి, బుమ్రా అద్భుత బ్యాటింగ్ ప్రదర్శనతో ఇంగ్లాండ్‌ ముందు భారత్ 272 పరుగుల లక్ష్యాన్ని ఉంచింది. అనంతరం రెండో ఇన్నింగ్స్ లో బ్యాటింగ్ కు దిగిన ఇంగ్లాండ్ జట్టు 120 పరుగులకే కుప్పకూలింది. రెండో ఇన్నింగ్స్‌ లో సిరాజ్‌ 4, బుమ్రా 3, ఇషాంత్‌ 2 వికెట్లతో విజృంభించడంతో ఇంగ్లాండ్ బ్యాట్స్ మెన్ పూర్తిగా చేతులెత్తశారు. కెప్టెన్ జో రూట్ (33), జాస్ బట్లర్ (25) మాత్రమే పరుగులు సాధించగలిగారు. తొలి ఇన్నింగ్స్‌లో నాలుగు వికెట్లు, రెండో ఇన్నింగ్స్‌లో నాలుగు వికెట్ల తీసి సిరాజ్ ఈ విజయంలో కీలక పాత్ర పోషించాడు. తొలి ఇన్నింగ్స్ లో సెంచరీ చేసిన కేఎల్ రాహుల్ ప్లేయర్ ఆఫ్ ది మ్యాచ్ అవార్డు గెలుచుకున్నాడు. ఇక ఇరు జట్ల మధ్య మూడో టెస్ట్ ఆగస్టు 25 నుంచి హీడింగ్లి స్టేడియంలో జరగనుంది.