దేశ రాజధాని ఢిల్లీ వేదికగా రాజకీయ వాతావరణం ఒక్కసారిగా వేడెక్కింది. లోక్‌సభ ప్రతిపక్ష నేత రాహుల్ గాంధీ ప్రధానమంత్రి నరేంద్ర మోదీకి మరోసారి బహిరంగ చర్చకు సిద్ధం కావాలని సవాల్ విసిరారు. ప్రధాని మోదీ తనపై, విపక్షాలపై చేసిన “విదేశీ సహాయం” మరియు “దేశద్రోహ” ఆరోపణలపై ఏ వేదిక మీదైనా, ఎప్పుడైనా చర్చకు తాను సిద్ధమని స్పష్టం చేస్తూ రాహుల్ గాంధీ ఒక వీడియో సందేశాన్ని విడుదల చేశారు.
తమ సవాల్‌కు 24 గంటలు గడిచినా అధికార పక్షం నుంచి స్పందన లేదని ఆయన మండిపడ్డారు. అయితే, ఈ వివాదానికి ప్రధాన కారణం గుజరాత్‌లో జరిగిన ఏక్తా దివస్ వేడుకల్లో ప్రధాని మోదీ చేసిన వ్యాఖ్యలే. విపక్షాలు దేశ అభివృద్ధికి అడ్డుపడుతున్నాయని, కొందరు నాయకులు విదేశాలకు వెళ్లి రహస్య సమావేశాలు జరుపుతూ దేశ శత్రువుల భాష మాట్లాడుతున్నారని మోదీ పరోక్షంగా విమర్శించారు.
దీనిపై తీవ్రంగా స్పందించిన రాహుల్ గాంధీ.. ప్రధాని మోదీ విదేశీ శక్తుల అండదండలతోనే అధికారంలోకి వచ్చారని, దేశ ఆర్థిక వ్యవస్థ కూడా విదేశీ నియంత్రణలోనే నడుస్తోందని ఆరోపించారు. “మీకు దమ్ముంటే ఏ స్టేజ్ మీదకైనా రాండి, ఎప్పుడైనా డిబెట్ చేద్దాం. నా దగ్గర ఉన్న నిజాలు చూసి మీరు భయపడుతున్నారు” అని సవాల్ విసిరారు.
ఈ బహిరంగ చర్చకు మీడియాను, దేశ యువతను ఆహ్వానించవచ్చని, కావాలంటే ఈ చర్చకు మోదీ ఎవరినైనా జడ్జిగా నియమించవచ్చంటూ ఆర్ఎస్ఎస్ చీఫ్ మోహన్ భాగవత్ పేరును కూడా రాహుల్ ప్రస్తావించారు. దేశ ఆర్థిక వ్యవస్థ, విదేశీ ఒప్పందాలు, అదానీ అంశం తదితర విభిన్న విషయాలపై బహిరంగంగా చర్చ జరగాలని డిమాండ్ చేశారు. తనపై అనేక పరువు నష్టం కేసులు పెట్టిన ప్రభుత్వం, ఈ “విదేశీ సంబంధాల” అంశంపై మాత్రం ఎందుకు ఎలాంటి పరువు నష్టం దావా వేయలేదని ఆయన నిలదీశారు.
మరోవైపు రాహుల్ గాంధీ సవాల్‌పై కేంద్ర మంత్రులు మరియు భాజపా నాయకులు తీవ్రస్థాయిలో తిప్పికొట్టారు. ప్రత్యేక ఓటర్ల జాబితా సంక్షిప్త సవరణ (SIR), ఈవీఎంలు తదితర అంశాలపై పార్లమెంట్‌లో ప్రత్యేక సమావేశం ఏర్పాటు చేసి చర్చించడానికి ప్రభుత్వం సిద్ధంగా ఉందని కేంద్ర హోంమంత్రి అమిత్ షా స్పష్టం చేశారు. పార్లమెంట్‌ వేదికగా చర్చకు రావాలని సవాల్ విసిరినప్పటికీ, రాహుల్ గాంధీ కేవలం రాజకీయ లబ్ధికోసమే బహిరంగ చర్చలంటూ డ్రామాలు ఆడుతున్నారని కమలనాథులు మండిపడుతున్నారు.
