తమిళనాడు ముఖ్యమంత్రి సి. జోసెఫ్ విజయ్ ఎన్నికల్లో ఇచ్చిన మరో హామీని నెరవేర్చారు. దీనిలో భాగంగా తమిళగ వెట్రి కళగం (టీవీకే) మేనిఫెస్టోలోని ఒక కీలకమైన పథకానికి తాజాగా శ్రీకారం చుట్టారు. నవజాత శిశువుల కోసం ప్రవేశపెట్టిన ప్రతిష్ఠాత్మక ‘తాయ్ మామన్ తంగా మోతిరం’ (మేనమామ బంగారు ఉంగరం) సంక్షేమ పథకాన్ని ప్రారంభించారు. ఈ మేరకు నేడు మదురైలోని ప్రభుత్వ రాజాజీ ఆసుపత్రి వేదికగా అధికారికంగా ప్రారంభించారు. ఈ పథకం ద్వారా ప్రభుత్వ ఆసుపత్రుల్లో జన్మించే ప్రతీ బిడ్డకు ఉచితంగా ‘1 గ్రాము 22 క్యారెట్ల’ బంగారు ఉంగరాన్ని అందజేయనున్నారు.
పథకం నిబంధనలు మరియు అమలు విధానం:
-
అర్హత నిబంధనలు: తమిళనాడు శాశ్వత నివాస ధ్రువీకరణ కలిగి ఉండి, రాష్ట్ర ప్రభుత్వ ఆసుపత్రుల్లో జన్మించిన శిశువులకు ఈ ఉంగరం అందజేస్తారు. అలాగే తల్లులు రాష్ట్ర ప్రసవ మరియు శిశు సంరక్షణ పర్యవేక్షణ వ్యవస్థలో (PICME) నమోదై ఉండాలి.
-
రెట్రోస్పెక్టివ్ వర్తింపు: సీఎం విజయ్ జన్మదినమైన జూన్ 22, 2026 నుంచి ప్రభుత్వ ఆసుపత్రుల్లో జన్మించిన పిల్లలందరికీ ఈ పథకం వర్తింపజేస్తారు. జూన్ 22 నుంచి సెప్టెంబర్ 27 వరకు జన్మించిన శిశువులకు రాష్ట్రవ్యాప్తంగా ఏర్పాటు చేసిన 107 హబ్ సెంటర్ల ద్వారా ఉంగరాలను పంపిణీ చేయనుండగా, సెప్టెంబర్ 28 నుంచి ఆసుపత్రి డిశ్చార్జికి ముందే నేరుగా అందజేస్తారు.
-
బడ్జెట్ కేటాయింపులు: తమిళనాడులో ఏటా దాదాపు 4.2 లక్షల ప్రసవాలు ప్రభుత్వ ఆసుపత్రుల్లో జరుగుతాయి. ఏటా దాదాపు 4.41 లక్షల బంగారు ఉంగరాలను అందించేందుకు రాష్ట్ర ప్రభుత్వం రూ. 755.83 కోట్ల వార్షిక బడ్జెట్ను కేటాయించింది. తొలి విడత కింద 1.28 లక్షల ట్యాంపర్ ప్రూఫ్ ప్యాకింగ్ కలిగిన సీరియల్ నంబర్ ఉంగరాలను సిద్ధం చేశారు.
సురక్షితమైన ప్రసవాలను ప్రోత్సహించడం, ప్రభుత్వ వైద్య సేవలపై ప్రజల్లో నమ్మకాన్ని పెంచడం మరియు తల్లి, బిడ్డ ఆరోగ్య భద్రతను బలోపేతం చేయడమే ఈ వినూత్న పథకం ముఖ్య ఉద్దేశమని తమిళనాడు ప్రభుత్వం వెల్లడించింది.
