సుప్రీంకోర్టులో రాష్ట్ర ప్రభుత్వానికి అనుకూలంగా వచ్చిన చారిత్రాత్మక తీర్పు నేపథ్యంలో, హైదరాబాద్‌లోని మియాపూర్‌లో ఉన్న రూ.50,000 కోట్ల విలువైన 550 ఎకరాల విలువైన భూముల వ్యవహారంపై ముఖ్యమంత్రి ఎనుముల రేవంత్ రెడ్డి మీడియా సమావేశంలో తీవ్ర ఆరోపణలు గుప్పించారు. గత బీఆర్ఎస్ ప్రభుత్వ హయాంలో మాజీ సీఎం కేసీఆర్ మరియు ఆయన కుటుంబ సభ్యులు మియాపూర్ భూములను కొల్లగొట్టేందుకు కుట్ర పన్నారని, రెవెన్యూ రికార్డులను సైతం తారుమారు చేయడానికి యత్నించారని ఆయన మండిపడ్డారు.
ఈ భూవివాదంపై సుప్రీంకోర్టు తీర్పు వెలువడిన వెంటనే అధికారులు స్పందించి ఆ 550 ఎకరాల భూమిని వెంటనే స్వాధీనం చేసుకోవాలని, చుట్టూ రక్షణ గోడ (ఫెన్సింగ్) ఏర్పాటు చేయాలని సీఎం ఆదేశించారు. సుమారు 23 ఏళ్లుగా పెండింగ్‌లో ఉన్న ఈ కేసులో కాంగ్రెస్ ప్రభుత్వం పట్టుపుట్టి వాదనలు వినిపించి విజయం సాధించిందని తెలిపారు.
ప్రైవేట్ వ్యక్తులకు కట్టబెట్టేందుకు జరిగిన ప్రయత్నాలను అప్పట్లో ప్రతిపక్షంలో ఉన్న కాంగ్రెస్ పార్టీ తీవ్రంగా వ్యతిరేకించిందని, నేడు అధికారంలోకి వచ్చాక ఆ ప్రభుత్వ భూములను కాపాడటంలో సఫలమయ్యామని పేర్కొన్నారు. ఈ భూముల ద్వారా సమకూరే ఆదాయాన్ని లేదా భూ వినియోగంపై కేబినెట్ సబ్-కమిటీ ఇచ్చే నివేదిక ఆధారంగా తగిన నిర్ణయం తీసుకుంటామని సీఎం వెల్లడించారు.
అవసరమైతే ఈ భూముల అమ్మకం ద్వారా వచ్చే నిధులను విద్యార్థుల విద్యాభివృద్ధికి, ఉన్నత విద్యను మరింత బలోపేతం చేయడానికి వెచ్చిస్తామని స్పష్టం చేశారు. గత మూడేళ్లలో కాంగ్రెస్ ప్రభుత్వం సుమారు రూ. 1.50 లక్షల కోట్ల విలువైన ప్రభుత్వ భూములను రక్షించిందని, గత పదేళ్ల బీఆర్ఎస్ హయాంలో జరిగిన భూ ఆక్రమణలపై ఇప్పటికే సమగ్ర విచారణకు ఆదేశించామని ఆయన హెచ్చరించారు.
ఐఎంజీ భూముల విషయంలోనూ సుప్రీంకోర్టులో ప్రభుత్వానికి అనుకూలంగా తీర్పు వచ్చిందని సీఎం పేర్కొన్నారు. మంచిరేవులలోని 143 ఎకరాల ప్రభుత్వ భూమిని ప్రైవేట్ వ్యక్తులకు అప్పగించే ప్రయత్నం జరిగిందని కేటీఆర్‌పై ఆరోపణలు చేశారు. ఈ భూముల్లో 50 ఎకరాలను యంగ్ ఇండియా పోలీస్ స్కూల్‌కు కేటాయించినట్లు వివరించారు.
కంచె గచ్చిబౌలి, మామిడిపల్లి, గుర్రంగూడతో పాటు భూపాలపల్లి, భద్రాద్రి కొత్తగూడెం జిల్లాల్లో ప్రభుత్వ, అటవీ భూములను కాపాడేందుకు న్యాయపోరాటం చేసినట్లు రేవంత్ తెలిపారు. కాంగ్రెస్ ప్రభుత్వం అధికారంలోకి వచ్చిన తర్వాత మూడేళ్లలో రూ.1.50 లక్షల కోట్ల విలువైన భూములను రక్షించామని చెప్పారు. భూముల విక్రయం ద్వారా వచ్చే నిధులను అభివృద్ధి పనులకు వినియోగించే అంశంపై మంత్రివర్గ ఉపసంఘం అధ్యయనం చేస్తుందని వెల్లడించారు.
