తెలంగాణలో సాగునీటి ప్రాజెక్టులకు నిధులు కేటాయించండి – ప్రధాని మోదీకి సీఎం రేవంత్‌ రెడ్డి విజ్ఞప్తి

CM Revanth Reddy Requests PM Modi Rs.10k Cr Funds For Pending Irrigation Projects in Telangana

దేశ రాజధాని ఢిల్లీలో తెలంగాణ ముఖ్యమంత్రి ఎనుముల రేవంత్ రెడ్డి ప్రధాన మంత్రి నరేంద్ర మోదీతో ఆదివారం సమావేశమయ్యారు. ఈ కీలక భేటీలో రాష్ట్రానికి సంబంధించిన పలు కీలక అంశాలు, సాగునీటి ప్రాజెక్టుల అనుమతులు, కరువు నివారణ చర్యలు మరియు రాబోయే ప్రతిష్టాత్మక కార్యక్రమాలపై ప్రధానితో విస్తృతంగా చర్చించారు.

ఈ సమావేశంలో భాగంగా తెలంగాణలో పెండింగ్‌లో ఉన్న సాగునీటి ప్రాజెక్టుల పూర్తికి కేంద్రం నుంచి సుమారు రూ. 10,000 కోట్ల ఆర్థిక సహాయం అందించాలని సీఎం రేవంత్ రెడ్డి ప్రధానిని కోరారు. పాలమూరు-రంగారెడ్డి, సీతారామ, డిండి ఎత్తిపోతల పథకాలకు అవసరమైన పర్యావరణ అనుమతులను వేగవంతం చేసేలా సంబంధిత శాఖలను ఆదేశించాలని విజ్ఞప్తి చేశారు.

తుమ్మిడిహెట్టి ప్రాణహిత బ్యారేజీ ఎత్తు పెంపుపై మహారాష్ట్ర ప్రభుత్వంతో చర్చించి ఒప్పించేందుకు చొరవ చూపాలని కోరడంతో పాటు, సమ్మక్క-సారక్క బ్యారేజీకి సంబంధించి ఛత్తీస్‌గఢ్ ప్రభుత్వం నుంచి రావాల్సిన నిరభ్యంతర పత్రం (NOC) ఇప్పించాలని కోరినట్లు నీటిపారుదల శాఖ మంత్రి ఉత్తమ్ కుమార్ రెడ్డి వెల్లడించారు.

ఇదే పర్యటనలో భాగంగా, డిసెంబర్ 7 నుంచి 9 వరకు భారత్ ఫ్యూచర్ సిటీ, హైదరాబాద్‌లో నిర్వహించనున్న ‘ఇన్వెస్ట్ తెలంగాణ గ్లోబల్ సమ్మిట్’ మరియు డిసెంబర్ 11 నుంచి 22 వరకు రాష్ట్రంలో తొలిసారిగా జరగనున్న ‘ఖేలో ఇండియా యూత్ గేమ్స్’ ప్రారంభోత్సవాలకు ముఖ్య అతిథి విచ్చేయాలని ప్రధాని మోదీని సీఎం రేవంత్ రెడ్డి సాదరంగా ఆహ్వానించారు. ప్రధాని సానుకూలంగా స్పందించి, రాష్ట్ర అభివృద్ధికి కేంద్రం తరఫున పూర్తి సహకారం అందిస్తామని హామీ ఇచ్చినట్లు సీఎం కార్యాలయం తెలిపింది.

ఈ సమావేశంలో రాష్ట్ర నీటిపారుదల శాఖ మంత్రి ఎన్. ఉత్తమ్ కుమార్ రెడ్డి, క్రీడాశాఖ మంత్రి వాకిటి శ్రీహరి మరియు కేంద్రమంత్రి మన్‌సుఖ్ మాండవ్య కూడా పాల్గొన్నారు.

LEAVE A REPLY

Please enter your comment!
Please enter your name here