బెల్లంపల్లి మున్సిపల్‌ కమిషనర్‌ సస్పెన్షన్‌కు ఆదేశాలు, అధికారి అత్యుత్సాహంపై మంత్రి కేటీఆర్‌ ఆగ్రహం

July 30, 2022

అత్యుత్సాహంతో వ్యవహరించిన ఒక అధికారిపై రాష్ట్ర ఐటీ, పరిశ్రమల మంత్రి కే తారక రామారావు ఆగ్రహం వ్యక్తం చేశారు. ఈ మేరకు ఆ అధికారి ప్రవర్తనపై అసంతృప్తి వ్యక్తం చేసిన మంత్రి సదరు అధికారిని సస్పెండ్ చేస్తూ ఆదేశాలు ఇచ్చారు. ఇక వివరాల్లోకి వెళ్తే.. ఈ నెల 24న మంత్రి కేటీఆర్‌ జన్మదిన వేడుకలు జరిగిన సంగతి తెలిసిందే. అయితే ఈ వేడుకల్లో పాల్గొనలేదని పేర్కొంటూ బెల్లింపల్లి మున్సిపల్ కార్యాలయంలోని ముగ్గురి పురపాలక ఉద్యోగులకు కమిషనర్‌ నోటీసులు జారీ చేయడం సంచలనం కలిగించింది.

I am the last person to encourage sycophancy in politics or administration

Read about an over enthusiastic Municipal commissioner issuing a memo to subordinates for not attending my birthday celebrations!🤦‍♂️

Have asked @cdmatelangana to suspend the MC for his absurd behaviour

— KTR (@KTRTRS) July 29, 2022

ఈ క్రమంలో విషయం మంత్రి కేటీఆర్‌ దృష్టి రాగా బెల్లింపల్లి కమిషనర్‌ తీరుపై ఆగ్రహం వ్యక్తం చేస్తూ తీవ్రంగా స్పందించారు. వెంటనే ఆ కమిషనర్‌ను సస్పెండ్‌ చేయాలని మంత్రి సీడీఎంను ఆదేశించారు. ఈ తరహా అభిమానాన్ని తాను కోరుకోమని, ఇలాంటి వాటిని ప్రోత్సహించడంలో తాను చివరి వ్యక్తిననంటూ కేటీఆర్‌ ట్వీట్‌ చేశారు. కాగా రాష్ట్రంలో వర్షాలు, వరదల కారణంగా ప్రజలందరూ ఇబ్బందులు పడుతున్న కారణంగా ఈసారి తన జన్మదినాన్ని జరుపుకోవడం లేదని మంత్రి కేటీఆర్‌ ఇప్పటికే ప్రకటించారు. అయినాసరే సిబ్బంది తీరు మార్చుకోకపోవడం గమనార్హం. ఈ నేపథ్యంలోనే మంత్రి తీవ్ర నిర్ణయం తీసుకున్నట్లు తెలుస్తోంది.