చలపతిరావు హఠాన్మరణం తీవ్రంగా కలిచివేసింది, పరిశ్రమ మంచినటుడిని కోల్పోయింది – నందమూరి బాలకృష్ణ

December 25, 2022

ప్రముఖ సీనియర్ నటుడు చలపతిరావు హఠాన్మరణం తీవ్రంగా కలిచివేసిందని ప్రముఖ అగ్రనటుడు, నందమూరి బాలకృష్ణ అన్నారు. ఈ మేరకు బాలకృష్ణ ఒక ప్రకటన విడుదల చేశారు. “చలపతిరావు తన విలక్షణమైన నటనతో తెలుగు ప్రేక్షకులని అలరించారు. నిర్మాతగా కూడా మంచి చిత్రాలని నిర్మించారు. ఈ రోజు తెలుగు చిత్ర పరిశ్రమ మంచి నటుడిని కోల్పోయింది. మా కుటుంబంతో చలపతిరావుకి అవినాభావ సంబంధం వుంది. నాన్న ఎన్టీఆర్ తో కలసి అనేక చిత్రాల్లో నటించారు. నా చిత్రాల్లో కూడా మంచి పాత్రలు పోషించారు. చలపతిరావు మా కుటుంబ సభ్యుడు. చలపతిరావు ఆత్మకు శాంతి కలగాలని భగవంతుణ్ణి కోరుకుంటూ, ఆయన కుటుంబ సభ్యులకు నా ప్రగాఢ సానుభూతి తెలియజేస్తున్నాను” అని నందమూరి బాలకృష్ణ పేర్కొన్నారు.