తెలంగాణలో ఇందిరమ్మ చీరల పంపిణీ, కొత్త పెన్షన్ల జమ నవంబర్ 26కు వాయిదా

Telangana Govt Schedules Saree Distribution and New Pension Rollout on Nov 26

తెలంగాణలో ఈరోజు (నవంబరు 19) ఇందిరాగాంధీ జయంతి సందర్భంగా ప్రారంభం కావాల్సిన ఇందిరమ్మ చీరల పంపిణీ మరియు చేయూత పెన్షన్ల నిధుల జమ కార్యక్రమాలను రాష్ట్ర ప్రభుత్వం ఈ నెల 26వ తేదీకి వాయిదా వేసింది. సిద్దిపేట వేదికగా ముఖ్యమంత్రి ఎ. రేవంత్‌రెడ్డి చేతుల మీదుగా ఈ కార్యక్రమాలను ప్రారంభించాల్సి ఉండగా, వాటిని విడిగా, మరింత ఘనంగా నిర్వహించాలని నిర్ణయించి బుధవారం రాత్రి ప్రభుత్వం అధికారిక ఆదేశాలు జారీ చేసింది.

నవంబరు 26వ తేదీన రాష్ట్ర ప్రభుత్వం రాజ్యాంగ దినోత్సవాన్ని నిర్వహిస్తున్న నేపథ్యంలో, అదే రోజున ఈ సంక్షేమ కార్యక్రమాలకు శ్రీకారం చుట్టనుంది. రాజ్యాంగ దినోత్సవం (నవంబరు 26) సందర్భంగా రాష్ట్రవ్యాప్తంగా కోటి మంది మహిళలకు ఇందిరమ్మ చీరల పంపిణీతో పాటు, కొత్తగా ఎంపికైన 4,63,857 మంది లబ్ధిదారులకు చేయూత పెన్షన్ల నిధులను నేరుగా వారి బ్యాంకు ఖాతాల్లో జమ చేయనున్నట్లు అధికారులు తెలిపారు.

ఈ మేరకు క్షేత్రస్థాయిలో అన్ని ఏర్పాట్లను పకడ్బందీగా పూర్తి చేయాలని రాష్ట్ర పంచాయతీరాజ్, గ్రామీణాభివృద్ధి, మహిళా శిశు సంక్షేమ శాఖ మంత్రి సీతక్క పేదరిక నిర్మూలన సంస్థ (సెర్ప్ – SERP) సీఈవో దివ్యాదేవరాజన్‌కు స్పష్టమైన ఆదేశాలు జారీ చేశారు.

ఈసారి మహిళల కోసం ప్రత్యేకంగా చిలకపచ్చ రంగు చీరలను సిద్ధం చేయించగా, ఇప్పటికే ఆ స్టాక్ జిల్లాలకు చేరుకుందని అధికార వర్గాలు వెల్లడించాయి. అలాగే కొత్త చేయూత పెన్షన్లకు సంబంధించిన పెన్షన్ పత్రాల పంపిణీ ప్రక్రియ కూడా ఇప్పటికే పూర్తయిందని తెలిపాయి.

నవంబరు 26న లాంఛనంగా ప్రారంభించిన వెంటనే జిల్లాలు, మండలాలు మరియు గ్రామస్థాయిలో లబ్ధిదారులకు ఎలాంటి ఇబ్బందులు లేకుండా చీరల పంపిణీ, పెన్షన్ల నిధుల జమ ప్రక్రియను వేగవంతం చేయాలని ప్రభుత్వం యోచిస్తోంది.

ఇందిరాగాంధీ జయంతి వేళ సిద్దిపేటలో జరగాల్సిన ప్రారంభోత్సవాన్ని వాయిదా వేసి రాజ్యాంగ దినోత్సవ వేడుకలతో అనుసంధానించడం ద్వారా, కోటి మంది మహిళలు మరియు నాలుగున్నర లక్షలకు పైగా కొత్త పెన్షన్ లబ్ధిదారులకు ఒకేసారి పెద్ద వేడుకగా ఈ పథకాలను అందించాలని రేవంత్‌రెడ్డి సర్కార్ లక్ష్యంగా పెట్టుకుంది.

LEAVE A REPLY

Please enter your comment!
Please enter your name here