తెలంగాణలో నేటి రాత్రితో ముగియ‌నున్న‌ పోలీస్ ఉద్యోగాల‌ దర‌ఖా‌స్తు ప్ర‌క్రియ గడువు

May 20, 2022

తెలంగాణ రాష్ట్ర స్థాయి పోలీస్ రిక్రూట్‌మెంట్ బోర్డ్, పోలీస్ రిక్రూట్‌మెంట్ 2022 కోసం దరఖాస్తుల ప్రక్రియను ఈ రోజుతో ముగించనుంది. శుక్ర‌వారం రాత్రి 10 గంట‌ల వ‌ర‌కు ఆన్‌లైన్‌లో ద‌రఖాస్తు చేసుకునేందుకు అవ‌కాశం ఉందని పోలీస్‌ శాఖ తెలిపింది. తెలంగాణ పోలీస్‌ శాఖలోని సాధారణ పోలీస్‌, ఎక్సైజ్‌, ఫైర్‌, జైళ్లు మరియు రవాణా శాఖ వంటి వివిధ విభాగాల్లో మొత్తం 17,291 ఉద్యో‌గాల భర్తీకి ఈ నెల 2 నుంచి నోటిఫికేషన్ ఇచ్చిన విషయం తెలిసిందే. ఇప్పటివరకు వ‌ర‌కు 5.2 ల‌క్ష‌ల మంది అభ్య‌ర్థుల నుంచి 9.33 లక్షల దర‌ఖా‌స్తులు వచ్చాయని తెలంగాణ పోలీసు శాఖ ప్రకటించింది. కాగా నిన్న ఒక్క రోజే ల‌క్ష మందికి పైగా ద‌ర‌ఖాస్తు చేసుకున్నారని పోలీస్‌ శాఖ వెల్లడించింది. ఇక మహిళా అభ్య‌ర్థుల నుంచి కూడా భారీగా 2 లక్షలకు పైగా దర‌ఖా‌స్తులు వచ్చా‌యని తెలిపింది. ప్రస్తుతం అందిన దర‌ఖా‌స్తుల్లో బీసీ అభ్య‌ర్థులు 52 శాతం, ఎస్సీలు 22 శాతం, ఎస్టీలు 19 శాతం, ఓసీలు 7 శాతంగా ఉన్నట్లు పేర్కొంది. గడువు నేటితో ముగియనున్నందున ఆసక్తి గల అభ్యర్థులు tslprb.in అధికారిక సైట్ ద్వారా ఆన్‌లైన్‌లో దరఖాస్తు చేసుకోవచ్చని పేర్కొంది.