జనసేన పార్టీ మూడో విడత క్రియాశీలక సభ్యత్వ నమోదు కార్యక్రమం శుక్రవారం ప్రారంభం అయింది. హైదరాబాద్ లో జనసేన పార్టీ రాజకీయ వ్యవహారాల కమిటీ ఛైర్మన్ నాదెండ్ల మనోహర్ సభ్యత్వ నమోదును సాంకేతికంగా ప్రారంభించి, మొదటి సభ్యత్వాన్ని స్వీకరించారు. ఈ మేరకు జనసేన పార్టీ ఒక ప్రకటన విడుదల చేసింది. ఆంధ్రప్రదేశ్, తెలంగాణ రాష్ట్రాల్లోని అన్ని అసెంబ్లీ నియోజక వర్గాల్లో క్రియాశీలక సభ్యత్వ నమోదు కార్యక్రమం మొదలైందని, ఈ ప్రక్రియ ఈ నెల 28వ తేదీ వరకు సాగుతుందని తెలిపారు. సభ్యత్వ నమోదు కార్యక్రమం ప్రారంభం సందర్భంగా నాదెండ్ల మనోహర్ మాట్లాడుతూ “రాజకీయ పార్టీ కార్యకర్తలంటే ఇప్పటి వరకు రాజకీయంగా ఉపయోగించుకోవడం వరకే పరిమితం అయ్యేవారు.. జనసేన పార్టీ మాత్రం వారిని ఆపదలో ఉంటే ఆదుకునే ఆలోచన చేసింది. కార్యకర్తలకు భరోసా నింపేందుకు, కష్టంలో ఉన్న క్రియాశీలక కార్యకర్తల కుటుంబాల దగ్గరకు ప్రత్యక్షంగా వెళ్లి వారికి ధైర్యం చెప్పి, పార్టీ తరఫున ఆర్థిక సాయం చేయాలనే గొప్ప ఆలోచన పవన్ కళ్యాణ్ ది. కార్యకర్తల కుటుంబాల వద్దకు వెళ్తున్న సమయంలో వారు చెబుతున్న మాటలు నాయకుడి గొప్ప ఆలోచనను, స్ఫూర్తిని తెలియజేస్తున్నాయి” అని అన్నారు.
“ప్రమాదవశాత్తు క్రియాశీలక కార్యకర్తకు జరగరానిది జరిగితే, పార్టీ నుంచి మేమున్నామని వారి కుటుంబానికి ఆప్తహస్తం అందించే ప్రక్రియ ఇది. పార్టీలో క్రియాశీలక కార్యకర్తలంతా అంచెలంచెలుగా జీవితంలో ఎదుగుతున్న వారు. కుటుంబం కోసం కష్టించి పని చేసేవారే. మన జనసేన కుటుంబం ఇంత గొప్పదా అనే స్థాయికి పార్టీని తీసుకెళ్లడంలో అందరి కృషి ఉంది. సభ్యత్వం తీసుకునేందుకు అన్నీ వర్గాల వారు చాలా ఆసక్తిగా ఉన్నారు. వారందరినీ పార్టీకి దగ్గర చేద్దాం. పార్టీ క్రియాశీలక సభ్యులకు తగిన ప్రాధాన్యం ఉంటుంది. పార్టీ కార్యక్రమాలను ఎప్పటికప్పుడు తెలియజేయడం, భవిష్యత్తు పార్టీ కార్యక్రమాలపై శిక్షణ, నాయకులతో ప్రత్యేక ఇంటరాక్షన్లు ఉంటాయి. పార్టీ సిద్ధాంతాలు, పవన్ కళ్యాణ్ ఆశయాలను ప్రజల్లోకి బలంగా తీసుకెళ్లేలా క్రియాశీలక కార్యకర్తలు పనిచేయాలి. అన్ని వర్గాలను కలుపుకొని వెళ్లి జగమంత కుటుంబంలా జనసేన క్రియాశీలక సభ్యత్వ నమోదు కార్యక్రమాన్ని విజయవంతం చేయాలని ప్రతి ఒక్కరినీ మనస్ఫూర్తిగా కోరుతున్నాను” అని నాదెండ్ల మనోహర్ పేర్కొన్నారు. ఈ కార్యక్రమంలో జనసేన పార్టీ అధ్యక్షుడు పవన్ కళ్యాణ్ రాజకీయ కార్యదర్శి పి.హరిప్రసాద్, తదితరులు పాల్గొన్నారు.
మ్యాంగో న్యూస్ లింక్స్:
టెలీగ్రామ్ : https://t.me/mangonewsofficial
గూగుల్ ప్లే స్టోర్ : https://bit.ly/2R4cbgN
ఆపిల్/ఐఓఎస్ స్టోర్ : https://apple.co/2xE