నేటి నుంచే ఆసియా కప్-2022 సూపర్-4 రౌండ్: రేపు భారత్, పాక్ మధ్య మరోసారి పోరు, షెడ్యూల్ ఇదే

September 3, 2022

ఆసియా కప్-2022 లో ఉత్కంఠభరిత మ్యాచ్ లు ప్రేక్షకులను విశేషంగా అలరిస్తున్న విషయం తెలిసిందే. యూఏఈలోని దుబాయ్ మరియు షార్జా వేదికల్లోనే ఈ టోర్నీ యొక్క మొత్తం 13 మ్యాచ్‌ లు జరగుతుండగా, శుక్రవారం జరిగిన హాంకాంగ్‌-పాక్‌ మధ్య మ్యాచ్‌ తో లీగ్ దశ మ్యాచ్ లు ముగిశాయి. గ్రూప్‌-ఏ నుంచి భారత్‌ రెండు విజయాలతో, పాకిస్థాన్‌ ఒక విజయంతో మొదటి రెండు స్థానాల్లో నిలిచి సూపర్ 4 రౌండ్ కి చేరుకోగా, హాంకాంగ్ జట్టు ఇంటిబాట పట్టింది, అదేవిధంగా గ్రూప్‌-బిలో ఆఫ్ఘానిస్థాన్‌ రెండు విజయాలతో, శ్రీలంక జట్టు ఒక విజయంతో మొదటి రెండు స్థానాల్లో నిలిచి సూపర్ 4 రౌండ్ కి చేరుకున్నాయి. ఆఫ్ఘానిస్థాన్‌, శ్రీలంకతో జరిగిన మ్యాచ్ లలో పరాజయంతో బంగ్లాదేశ్‌ జట్టు టోర్నీ నుంచి నిష్క్రమించింది.

ఈ నేపథ్యంలో నేటి నుంచి సూపర్-4 రౌండ్ ప్రారంభం కానుంది. అందులో సూపర్ 4లో మొత్తం ఆరు మ్యాచ్ లు జరగనుండగా, మొదటి 2 స్థానాల్లో నిలిచిన జట్లు ఫైనల్‌కు అర్హత సాధిస్తాయి. సూపర్-4 రౌండ్ లో భాగంగా ముందుగా శనివారం రాత్రి 7:30 గంటలకు ఆఫ్ఘానిస్థాన్‌, శ్రీలంక జట్లు పోటీపడనున్నాయి. ఇక మ్యాచ్ 2లో భాగంగా ఆదివారం రాత్రి 7:30 గంటలకు దుబాయ్ వేదికగా భారత్, పాకిస్తాన్ జట్లు ఆసియా కప్‌ లో మరోసారి తలపడనున్నాయి. దాయాదుల మధ్య పోరుకై క్రీడాభిమానులు మరోసారి ఆసక్తిగా ఎదురుచూస్తున్నారు. ఇక సెప్టెంబర్ 11న జరిగే ఫైనల్‌ మ్యాచ్ తో ఆసియా కప్-2022 ముగియనుంది.