దేశంలో 200 కోట్ల మైలురాయి దాటిన కోవిడ్-19 వ్యాక్సిన్ డోసులు పంపిణీ, ప్రధాని మోదీ ప్రశంసలు

July 18, 2022

దేశంలో కోవిడ్ మహమ్మారిపై పోరాటంలో భాగంగా కోవిడ్-19 వ్యాక్సినేషన్ కార్యక్రమం విజయవంతంగా కొనసాగుతుంది. ఈ నేపథ్యంలో వ్యాక్సినేషన్ లో భాగంగా దేశంలో ఇప్పటివరకు ప్రజలకు అందించిన మొత్తం కోవిడ్ వ్యాక్సిన్ డోసుల సంఖ్య 200 కోట్లు దాటింది. జూలై 17, ఆదివారం మధ్యాహ్నం 1 గంట సమయంలో 200 కోట్ల మైలురాయిని అధిగమించినట్టు కేంద్ర ఆరోగ్య, కుటుంబ సంక్షేమ శాఖ వెల్లడించింది. ఇక జూలై 18, సోమవారం ఉదయం 7 గంటల వరకు ప్రజలకు అందించిన కోవిడ్ వ్యాక్సిన్ డోసుల సంఖ్య 2,00,04,61,095 కు చేరుకుంది. ఇప్పటికి మొత్తం 2,63,34,227 సెషన్ల ద్వారా వ్యాక్సినేషన్ కార్యక్రమం చేపట్టినట్టు తెలిపారు.

సైన్స్‌పై విశేషమైన విశ్వాసాన్ని కనబరుస్తున్నందుకు మరియు 200 కోట్ల కోవిడ్-19 వ్యాక్సిన్ డోసుల మైలురాయిని దాటినందుకు ప్రధాన మంత్రి నరేంద్ర మోదీ దేశ ప్రజలను ప్రశంసించారు. ఈ మేరకు ప్రధాని మోదీ ట్వీట్ చేస్తూ, “భారత్ మళ్లీ చరిత్ర సృష్టిచింది. 200 కోట్ల వ్యాక్సిన్ డోసుల ప్రత్యేక సంఖ్యను దాటినందుకు భారతీయులందరికీ అభినందనలు. భారతదేశం యొక్క వ్యాక్సినేషన్ డ్రైవ్‌ను స్కేల్ మరియు వేగంలో అసమానంగా మార్చడానికి సహకరించిన వారి పట్ల గర్వంగా ఉంది. ఇది కోవిడ్-19కి వ్యతిరేకంగా ప్రపంచ పోరాటాన్ని బలోపేతం చేసింది. వ్యాక్సిన్‌ను విడుదల చేసిన సమయంలో దేశ ప్రజలు సైన్స్‌పై విశేషమైన విశ్వాసాన్ని ప్రదర్శించారు. మన వైద్యులు, నర్సులు, ఫ్రంట్‌లైన్ వర్కర్స్, శాస్త్రవేత్తలు, ఆవిష్కర్తలు మరియు వ్యవస్థాపకులు సురక్షితమైన ప్రపంచాన్ని నిర్ధారించడంలో కీలక పాత్ర పోషించారు. వారి స్పిరిట్ మరియు సంకల్పాన్ని నేను అభినందిస్తున్నాను” అని ప్రధాని మోదీ పేర్కొన్నారు.