అమెరికా మాజీ అధ్యక్షుడు బరాక్‌ ఒబామాకు కరోనా పాజిటివ్, త్వరగా కోలుకోవాలని ప్రధాని మోదీ ట్వీట్

March 14, 2022

అమెరికా మాజీ అధ్యక్షుడు బరాక్‌ ఒబామాకు కోవిడ్-19 పాజిటివ్‌ గా నిర్ధారణ అయింది. ఈ విషయాన్ని ఆయనే స్వయంగా ట్విట్టర్‌ వేదికగా ప్రకటించారు. “నాకు కోవిడ్ పాజిటివ్ గా తేలింది. రెండు రోజుల నుంచి గొంతు సమస్యతో ఇబ్బంది పడుతున్నాను. కానీ నేను బాగానే ఉన్నాను. మిచెల్‌, నేను వ్యాక్సిన్‌ తీసుకున్నాం, బూస్టర్ డోస్ కూడా తీసుకున్నాం. కోవిడ్ పరీక్షల్లో మిచెల్‌ కు నెగెటివ్‌ గా తేలింది. కేసులు తగ్గుముఖం పట్టినప్పటికీ, మీరు ఇప్పటికి వ్యాక్సిన్‌ తీసుకోకుంటే వెంటనే వ్యాక్సిన్ తీసుకోవాలని కోరుతున్నాను” అని బరాక్ ఒబామా ట్వీట్‌ చేశారు. ఒబామా ట్వీట్‌ నేపథ్యంలో ఆయన కోవిడ్ నుంచి త్వరగా కోలుకోవాలని పలువురు ప్రపంచ నేతలు, సన్నిహితులు, అభిమానులు సోషల్ మీడియాలో పోస్టులు పెడుతున్నారు.

అలాగే కోవిడ్-19 నుండి త్వరగా కోలుకోవాలని అమెరికా మాజీ అధ్యక్షుడు బరాక్ ఒబామాకు ప్రధాన మంత్రి నరేంద్ర మోదీ శుభాకాంక్షలు తెలిపారు. “బరాక్ ఒబామా మీరు కోవిడ్-19 నుండి త్వరగా కోలుకోవాలి. మీ కుటుంబం యొక్క మంచి ఆరోగ్యం మరియు శ్రేయస్సు కోసం శుభాకాంక్షలు” అని ప్రధాని మోదీ ట్వీట్ చేశారు.