పీడీఆర్డీ గ్రాంట్ కింద 14 రాష్ట్రాలకు రూ.7,183.42 కోట్లు విడుదల చేసిన కేంద్రం, ఏపీకి రూ.879.08 కోట్లు

May 7, 2022

కేంద్ర ఆర్థిక శాఖ దేశంలోని 14 రాష్ట్రాలకు శుక్రవారం రూ.7,183.42 కోట్లు విడుదల చేసింది. 15వ ఆర్థిక సంఘం సిఫార్సుల మేరకు పోస్ట్ డెవల్యూషన్ రెవెన్యూ డెఫిసిట్ గ్రాంట్ కింద ఈ ఆర్ధిక సంవత్సరంలో రెండో విడతగా 14 రాష్ట్రాలకు 7,183.42 కోట్లు విడుదల చేసినట్టు కేంద్ర ఆర్థిక శాఖ తెలిపింది. 15వ ఆర్థిక సంఘం పీడీఆర్డీ గ్రాంట్ కింద 2022-23 ఆర్థిక సంవత్సరానికి గానూ 14 రాష్ట్రాలకు మొత్తం 86,201 కోట్లు సిఫార్సు చేసిందని చెప్పారు.

సిఫార్సు చేయబడిన గ్రాంట్‌ని 12 సమానమైన నెలవారీ వాయిదాలలో సిఫార్సు చేయబడిన 14 రాష్ట్రాలకు విడుదల చేయడం జరుగుతుందని, అందులో భాగంగా 2022-23లో ఇప్పటివరకు రాష్ట్రాలకు విడుదల చేసిన రెవెన్యూ డెఫిసిట్ గ్రాంట్ల మొత్తం రూ.14,366.84 కోట్లుకు చేరిందని చెప్పారు. ఈ 14 రాష్ట్రాల్లో ఆంధ్రప్రదేశ్, అస్సాం, హిమాచల్ ప్రదేశ్, కేరళ, మణిపూర్, మేఘాలయ, మిజోరాం, నాగాలాండ్, పంజాబ్, రాజస్థాన్, సిక్కిం, త్రిపుర, ఉత్తరాఖండ్ మరియు పశ్చిమ బెంగాల్ ఉన్నాయి.