యునైటెడ్ కింగ్ డమ్ లో కొత్తరకం కరోనా వైరస్ స్ట్రెయిన్ విజృంభణతో గత కొన్ని రోజులుగా వేల సంఖ్యలో పాజిటివ్ కేసులు నమోదవుతున్నాయి. ఈ నేపథ్యంలో ఇప్పటికే ఫైజర్ కరోనా వ్యాక్సిన్ కు అనుమతి ఇచ్చిన యూకే ప్రభుత్వం తాజాగా ఆక్స్‌ఫర్డ్‌ యూనివర్సిటీతో కలిసి ఆస్ట్రాజెనికా తయారు చేసిన కరోనా వ్యాక్సిన్ కు కూడా ఆమోదం తెలిపింది. ఆక్స్‌ఫర్డ్‌-ఆస్ట్రాజెనెకా అభివృద్ధి చేసిన వ్యాక్సిన్ కు ఆమోదం తెలిపామని, వచ్చే వారం నుంచి ఈ వ్యాక్సిన్ పంపిణీ కూడా ప్రారంభించనున్నట్టు యూకే ప్రభుత్వం బుధవారం నాడు వెల్లడించింది.
త్వరలో భారత్ లో కూడా అనుమతి?
మరోవైపు ఆక్స్‌ఫర్డ్‌-ఆస్ట్రాజెనికా కరోనా వ్యాక్సిన్ రెండు మరియు మూడో దశ క్లినికల్‌ ట్రయల్స్ ను సీరం ఇన్స్టిట్యూట్ ఆఫ్ ఇండియా(ఎస్‌ఐఐ) దేశంలో నిర్వహించిన సంగతి తెలిసిందే. కోవిషిల్డ్ పేరుతో అభివృద్ధి చేసిన ఈ వ్యాక్సిన్ కోసం సీరం ఇన్స్టిట్యూట్ ఆఫ్ ఇండియా ఇప్పటికే అత్యవసర వినియోగానికి అనుమతించాలని కోరుతూ డ్రగ్ కంట్రోలర్ జనరల్ ఆఫ్ ఇండియా (డీసీజీఐ) కు దరఖాస్తు చేసింది. ఈ నేపథ్యంలో ఈ వ్యాక్సిన్ కు అనుమతిపై నిర్ణయం తీసుకునేందుకు డ్రగ్స్ స్టాండర్డ్ కంట్రోల్ ఆర్గనైజేషన్ (సిడిఎస్ సిఓ) నిపుణుల కమిటీ బుధవారం నాడు సమావేశమైనట్టు సమాచారం. యూకేలో ఈ వ్యాక్సిన్ కు అనుమతులు లభించడంతో దేశంలో కూడా తొలి అనుమతులు కొవిషీల్డ్‌ వ్యాక్సిన్ కే వచ్చే అవకాశాలు కన్పిస్తున్నాయి.
మ్యాంగో న్యూస్ లింక్స్:
టెలీగ్రామ్ : https://t.me/mangonewsofficial
గూగుల్ ప్లే స్టోర్ : https://bit.ly/2R4cbgN
ఆపిల్/ఐఓఎస్ స్టోర్ : https://apple.co/2xEYFJ
