ఉక్రెయిన్ సంక్షోభం: భారత్ లో మెడికల్‌ కాలేజీ ఏర్పాటుకు ముందుకొచ్చిన ఆనంద్ మహీంద్రా

March 3, 2022

ఉక్రెయిన్‌లో చిక్కుకుపోయిన కర్ణాటక రాష్ట్రానికి చెందిన ఒక వైద్య విద్యార్థి రష్యా సైనిక చర్య కారణంగా మరణించడంతో భారతదేశ వైద్య విద్యా వ్యవస్థపై ఇప్పుడు అందరి చూపు పడింది. ఈ సంఘటన భారతదేశ వైద్య విద్యా వ్యవస్థ లోని మౌలిక లోపాలను బహిర్గతం చేయడంతో పలువురు విద్యావేత్తలు ఆందోళన వ్యక్తం చేస్తున్నారు. మనదేశంలో ఒక సరైన వైద్య విద్యా వ్యవస్థ ఉండాలని మేథావులు భావిస్తున్నారు. ఈ నేపథ్యంలో.. భారత వ్యాపార దిగ్గజం, మహీంద్రా గ్రూప్ ఛైర్మన్, ఆనంద్ మహీంద్రా కూడా భారతదేశంలో వైద్య కళాశాలల కొరతపై ఆందోళన వ్యక్తం చేశారు. మహీంద్రా యూనివర్శిటీ క్యాంపస్‌లో మెడికల్ స్టడీస్ ఇన్‌స్టిట్యూషన్‌ను ఏర్పాటు చేయాలని ఆయన తలపోస్తున్నారు.

ఆనంద్ మహీంద్రా తన ట్విట్టర్‌లో ఇలా వ్రాశారు.. “భారతదేశంలో వైద్య కళాశాలల కొరత ఉందని నాకు తెలియదు. ఎందుకని ఇంతమంది మన విద్యార్థులు మెడిసిన్‌ చదివేందుకు ఇతర దేశాలకు వెళ్తున్నారు? ఈ విషయంపై దృష్టి సారించాల్సిన అవసరం ఉంది. దీన్ని అధిగమించేందుకు మహీంద్రా విశ్వవిద్యాలయం క్యాంపస్‌లో వైద్య అధ్యయన సంస్థను స్థాపించే ఆలోచనను మనం అన్వేషించగలమా?” అని అన్నారు. ఈ వివరాలు పరిశీలించాంటూ టెక్‌ మహీంద్రా చీఫ్‌ సీపీ గుర్నానిని ఆదేశించారు. ప్రస్తుతం మహీంద్రా యూనివర్సిటీ క్యాంపస్‌ హైదరాబాద్‌లోని జీడిమెట్లలో ఉంది. ఆనంద్‌ మహీంద్రా ఆలోచన కార్యరూపం దాల్చితే హైదరాబాద్‌ క్యాంపస్‌లోనే మెడికల్‌ కాలేజీ ఏర్పాటుకు ఆస్కారం ఉంది.

I had no idea that there was such a shortfall of medical colleges in India. @C_P_Gurnani could we explore the idea of establishing a medical studies institution on the campus of @MahindraUni ? https://t.co/kxnZ0LrYXV

— anand mahindra (@anandmahindra) March 3, 2022

కేంద్ర ప్రభుత్వ గణాంకాల ప్రకారం, ఉక్రెయిన్‌లో చిక్కుకుపోయిన 18,095 మంది భారతీయ విద్యార్థులలో 90% మంది మెడిసన్‌ చదువుతున్నారు. యుద్ధ భయంతో భారత ప్రభుత్వం ఉక్రెయిన్‌లో ఉంటున్న వేలాది మంది విద్యార్థులను ఖాళీ చేయించింది. ఈ విద్యార్థులు భారత్ కు తిరిగి రావటానికి విదేశాంగ శాఖ ఏర్పాటు చేసిన ప్రత్యేక విమానాలను చేరుకోవడానికి రొమేనియా, పోలాండ్ మరియు ఇతర పొరుగు దేశాలకు మైళ్ల దూరం నడిచారు. అయితే మెడిసిన్ చదవడానికి ఉక్రెయిన్‌కు వెళ్లిన విద్యార్థులలో మరికొంత మంది ఇప్పటికీ అక్కడే చిక్కుకుపోయి భయంతో జీవిస్తున్నారు.