అమెరికా అధ్యక్షుడు డోనాల్డ్ ట్రంప్ దంప‌తుల‌కు క‌రోనా పాజిటివ్‌

October 2, 2020

ప్రస్తుతం ప్రపంచవ్యాప్తంగా పలు దేశాల్లో కరోనా వైరస్ తీవ్ర ప్రభావం చూపుతున్న సంగతి తెలిసిందే. ముఖ్యంగా అగ్రరాజ్యం అమెరికాలో కరోనా తీవ్రత ఎక్కువుగా ఉంది. ఈ నేపథ్యంలో అమెరికా అధ్యక్షుడు డొనాల్డ్ ట్రంప్ కూడా కరోనా బారిన పడ్డారు. ట్రంప్ తో పాటుగా ఆయన భార్య, అమెరికా ప్రథమ మహిళ మెలానియాకు కూడా కరోనా పాజిటివ్ గా నిర్ధారణ అయింది. ఈ విషయాన్ని ట్రంప్ స్వయంగా తన అధికారిక ట్విట్టర్ ఖాతా ద్వారా వెల్ల‌డించారు. “మెలనియా ట్రంప్ కు, నాకు కోవిడ్-19 పాజిటివ్ గా నిర్ధారణ అయింది. క్వారంటైన్ ప్రక్రియ, రికవరీ పక్రియను వెంటనే ప్రారంభించాము. వైర‌స్ బారి నుంచి త్వరలోనే బయటపడతాము” అని ట్రంప్ ట్వీట్ చేశారు.

ముందుగా అధ్యక్షుడు డోనాల్డ్ ట్రంప్ స‌ల‌హాదారు హోప్ హిక్స్‌కు క‌రోనా పాజిటివ్ గా తేలింది. ఈ నేపథ్యంలో ట్రంప్ దంపతులు కరోనా పరీక్షలు చేయించుకున్నారు. ఫలితాల కోసం ఎదురుచూస్తున్నామని, క్వారంటైన్ పక్రియ మొదలుపెట్టామని ట్రంప్ ట్విట్టర్ లో వెల్లడించారు. ఈ క్రమంలో వారికీ కూడా కరోనా పాజిటివ్ గా తేలినట్టు ప్రకటించారు. ప్ర‌స్తుతం వారిద్ద‌రూ ఆరోగ్యంగానే ఉన్నార‌ని, వైట్‌హౌజ్‌లోనే క్వారంటైన్ లో ఉన్నట్లు అధికారులు వెల్లడించారు.

Tonight, @FLOTUS and I tested positive for COVID-19. We will begin our quarantine and recovery process immediately. We will get through this TOGETHER!

— Donald J. Trump (@realDonaldTrump) October 2, 2020