ఫిఫా ప్రపంచకప్ 2026 ప్రిక్వార్టర్స్లో పోర్చుగల్ జట్టు స్పెయిన్ చేతిలో 1-0 తేడాతో ఓటమిపాలై టోర్నీ నుంచి నిష్క్రమించింది. చివరి వరకు ఉత్కంఠగా సాగిన మ్యాచ్లో ఎక్స్ట్రా టైమ్లో స్పెయిన్ ప్రత్యామ్నాయ ఆటగాడు మికెల్ మెరినో చేసిన గోల్ మ్యాచ్ ఫలితాన్ని నిర్ణయించింది. ఈ విజయంతో స్పెయిన్ క్వార్టర్ ఫైనల్కు చేరగా, పోర్చుగల్ ప్రపంచకప్ ప్రయాణం ముగిసింది.
నెరవేరని రొనాల్డో చివరి కల
2006లో ప్రపంచకప్ అరంగేట్రం చేసిన క్రిస్టియానో రొనాల్డో, 2026 టోర్నీనే తన చివరి ప్రపంచకప్ అని ముందుగానే ప్రకటించాడు. దీంతో ప్రపంచవ్యాప్తంగా ఉన్న సాకర్ అభిమానులు ఈ మ్యాచ్ కోసం ఆసక్తిగా ఎదురుచూశారు. అయితే, 41 ఏళ్ల వయసులోనూ జట్టును ప్రపంచ ఛాంపియన్గా నిలపాలన్న రొనాల్డో కల ఈ ఓటమితో అసంపూర్తిగానే మిగిలిపోయింది. మ్యాచ్ ముగిసిన వెంటనే ఈ దిగ్గజ ఆటగాడు మైదానంలో భావోద్వేగానికి గురై కన్నీళ్లు పెట్టుకోవడం అభిమానులను కలచివేసింది.
Bahkan yang terbaik pun tidak bisa menulis ulang takdir.
Cristiano Ronaldo akhirnya harus menerima kenyataan pahit bahwa dirinya memang tidak pernah ditakdirkan untuk memenangkan Piala Dunia. Meski telah menjaga fisik di level tertinggi hingga usia 41 tahun demi memimpin… pic.twitter.com/PGhIcbxT7z
— PanditFootball.com (@panditfootball) July 6, 2026
ప్రపంచకప్తో ముగిసిన ఓ స్వర్ణయుగం
ఆరు ప్రపంచకప్ టోర్నీల్లో పోర్చుగల్కు ప్రాతినిధ్యం వహించిన రొనాల్డో అనేక రికార్డులు సృష్టించినప్పటికీ, ప్రపంచకప్ ట్రోఫీ మాత్రం అతడికి అందని కలగానే మిగిలింది. రెండు దశాబ్దాలకు పైగా ప్రపంచ ఫుట్బాల్ను శాసించిన అతడు చివరి ప్రపంచకప్ మ్యాచ్ అనంతరం అభిమానులకు అభివాదం చేస్తూ భావోద్వేగ క్షణాలను పంచుకున్నాడు. ఆ దృశ్యాలు సోషల్ మీడియాలో వైరల్గా మారాయి.
స్పెయిన్ డిఫెన్స్ సరికొత్త రికార్డ్
ఈ విజయంతో స్పెయిన్ ప్రపంచకప్ చరిత్రలో వరుసగా ఆరు మ్యాచ్ల్లో క్లీన్ షీట్ నమోదు చేసిన తొలి జట్టుగా నిలిచింది. గతంలో ఇటలీ, స్విట్జర్లాండ్ పేరిట ఉన్న ఐదు వరుస క్లీన్ షీట్ల రికార్డును అధిగమించింది. క్లీన్ షీట్ అంటే, ప్రత్యర్థి జట్టుకు ఒక్క గోల్ కూడా చేసే అవకాశం ఇవ్వకపోవడం. స్పెయిన్ గోల్కీపర్ ఉనై సిమోన్ కూడా వరుసగా 609 నిమిషాల పాటు ప్రత్యర్థులకు గోల్ ఇవ్వకుండా నిలిచి ప్రపంచ రికార్డు నెలకొల్పాడు.
క్లబ్ ఫుట్బాల్లో కొనసాగనున్న రొనాల్డో
ప్రపంచకప్ ప్రయాణం ముగిసినప్పటికీ రొనాల్డో ఫుట్బాల్కు వీడ్కోలు చెప్పడం లేదు. క్లబ్ ఫుట్బాల్లో తన ప్రయాణాన్ని కొనసాగిస్తానని ఇప్పటికే స్పష్టం చేశాడు. అంతర్జాతీయ కెరీర్పై తుది నిర్ణయం ఎప్పుడు తీసుకుంటాననేది తర్వాత వెల్లడిస్తానని తెలిపాడు. ప్రపంచకప్ టైటిల్ గెలవలేకపోయినా, ప్రపంచ ఫుట్బాల్ చరిత్రలో అత్యుత్తమ ఆటగాళ్లలో ఒకరిగా రొనాల్డో పేరు చిరస్థాయిగా నిలిచిపోతుందని అభిమానులు, విశ్లేషకులు అభిప్రాయపడుతున్నారు.
