గత పదిహేను రోజుల నుండి దేశవ్యాప్తంగా, అలాగే తెలంగాణ రాష్ట్రంలో కూడా కోవిడ్-19 కేసులు స్వల్పంగా పెరుగుతున్న విషయం తెలిసిందే. కోవిడ్-19 కేసులు పెరుగుతుండటంతో ప్రజలు తప్పనిసరిగా జాగ్రత్తలు తీసుకోవాలని తెలంగాణ వైద్య ఆరోగ్యశాఖ సూచించింది. ఈ మేరకు కోవిడ్ పై తీసుకోవాల్సిన జాగ్రత్తలపై తెలంగాణ డైరెక్టర్ ఆఫ్ పబ్లిక్ హెల్త్ అండ్ ఫ్యామిలీ వెల్ఫేర్ జి.శ్రీనివాసరావు ఒక ప్రకటన విడుదల చేశారు. “కోవిడ్ కేసుల పెరుగుదలలో ఎలాంటి పరిణామాలనైనా ఎదుర్కొనేందుకు తెలంగాణ ప్రభుత్వం సిద్ధంగా ఉంది. రెండు డోస్‌లను తీసుకోవడం ద్వారా వ్యాక్సినేషన్ ను పూర్తి చేయడం చాలా ముఖ్యం. అలాగే ఫేస్ మాస్క్ ధరించడం మరియు భౌతిక దూరం పాటించడం వంటి జాగ్రత్తలు పాటించడం కూడా అంతే ముఖ్యం” అని పేర్కొన్నారు.
ఖచ్చితంగా పాటించాల్సిన జాగ్రత్తలు:
- వల్నరబుల్‌ గ్రూప్ (ప్రమాదం ఎక్కువుగా ఉన్న వాళ్ళు): 10 సంవత్సరాల కంటే తక్కువ వయస్సు ఉన్న పిల్లలు మరియు 60 ఏళ్లు పైబడిన పెద్దలు అవసరమైతే తప్ప బయటకు వెళ్లకుండా ఉండాలని సూచించారు.
- ససెప్టబుల్ ఏజ్ గ్రూప్: 20 నుండి 50 సంవత్సరాల మధ్య వయస్సు ఉన్నవారిలో కోవిడ్ వ్యాధి సంభవం ఎక్కువగా ఉంటుంది, కాబట్టి ప్రజలు పని/అవసరమైన కార్యకలాపాలకు వెళ్లేటప్పుడు తగిన జాగ్రత్తలు తీసుకోవాలని అభ్యర్థించారు.
- ఫేస్ మాస్క్‌ల వాడకం: ప్రతి ఒక్కరూ ఇంటి నుంచి బయటకు వెళ్లేటప్పుడు తప్పనిసరిగా మాస్క్ ధరించాలి. ఫేస్‌మాస్క్‌లు కోవిడ్-19 కి వ్యతిరేకంగా రక్షణ ఇవ్వడంలో మొదటి వరుసలో ఉన్నాయి.
- భౌతిక దూరం: వ్యక్తుల మధ్య 6 అడుగుల కంటే ఎక్కువ దూరం నిర్వహించడం ముఖ్యం. దయచేసి మీ ఇంటి బయట ఉన్నప్పుడు భౌతిక దూరం పాటించండి.
- వర్క్ ప్లేస్ (కార్యాలయాలు/ఆఫీసులు): పని ప్రదేశాలలో చేతులు కడుక్కోవడానికి సబ్బు మరియు శానిటైజర్ సదుపాయం అందించాలి. ఉద్యోగుల మధ్య తగిన భౌతిక దూరం పాటించాలి.
- ప్రయాణం: అనవసర ప్రయాణాలకు దూరంగా ఉండాలని పౌరులను అభ్యర్థించారు. ఒకవేళ అది అనివార్యమైనట్లయితే, ఫేస్ మాస్క్‌లు, హ్యాండ్ వాష్/శానిటైజర్ వాడకం, భౌతిక దూరం మొదలైన అన్ని కోవిడ్ నిబంధనలను వారు పాటించాలి.
- వైద్య సంరక్షణను కోరడం: జ్వరం, దగ్గు, గొంతు నొప్పి, ముక్కు కారటం, శ్వాస తీసుకోవడంలో ఇబ్బంది, శరీర నొప్పులు మరియు తలనొప్పి వంటి ఏదైనా ఫ్లూ/ఇన్ఫ్లుఎంజా వంటి లక్షణాలు ఉంటే, దయచేసి సమీపంలోని ప్రభుత్వ ఆరోగ్య కేంద్రానికి నివేదించి, ఆలస్యం చేయకుండా ఆరోగ్య సేవలను పొందండి.
- సహ-అనారోగ్య పరిస్థితులు: అధిక రక్తపోటు, మధుమేహం, గుండె జబ్బులు, దీర్ఘకాలిక మూత్రపిండ వ్యాధి, క్రానిక్ అబ్స్ట్రక్టివ్ పల్మనరీ డిసీజ్, క్యాన్సర్ వంటి సహ-అనారోగ్య పరిస్థితులు ఉన్న వ్యక్తులు లేదా ఏదైనా ఇతర దీర్ఘకాలిక అనారోగ్యం ఉన్నవారు కోవిడ్‌కు గురికాకుండా ఉండటానికి ఇంట్లోనే ఉండి వైద్య సంరక్షణ కోసం తప్ప ఇతర అనవసర ప్రయాణాలకు దూరంగా ఉండాలని అభ్యర్థించారు.
- వ్యాక్సినేషన్: రెండు డోసుల కోవిడ్-19 వ్యాక్సిన్ తీసుకోవడం ద్వారా వ్యాక్సినేషన్ పూర్తి చేసుకోవాలి.
మ్యాంగో న్యూస్ లింక్స్:
టెలీగ్రామ్ : https://t.me/mangonewsofficial
గూగుల్ ప్లే స్టోర్ : https://bit.ly/2R4cbgN
ఆపిల్/ఐఓఎస్ స్టోర్ : https://apple.co/2xEY
