మహాకుంభ మేళాలో పాల్గొనే రాజకీయ నాయకులు, ధనవంతులు అక్కడే మరణించి మోక్షాన్ని పొందాలని లోక్‌సభ ఎంపీ రాజేశ్ రంజన్ అలియాస్ పప్పూ యాదవ్ సంచలన వ్యాఖ్యలు చేశారు. మంగళవారం పార్లమెంట్‌లో రాష్ట్రపతి ప్రసంగానికి కృతజ్ఞతల తీర్మానంపై జరిగిన చర్చలో ఆయన ఈ వ్యాఖ్యలు చేశారు.
బిహార్‌లోని పూర్నియా నుంచి స్వతంత్ర ఎంపీగా ఉన్న పప్పూ యాదవ్ మాట్లాడుతూ, జనవరి 29న మహాకుంభ మేళాలో జరిగిన తొక్కిసలాట ఘటనలో 300 నుంచి 600 మృతదేహాలను అక్కడి నుంచి తొలగించారని, అయితే వారి అంత్యక్రియలు హిందూ సాంప్రదాయ ప్రకారం నిర్వహించలేదని ఆరోపించారు.
నేను ఒక బాబా పేరును ప్రస్తావించను, కానీ ఆయన చెప్పిన మాటను చెప్పాలని ఉంది. తొక్కిసలాటలో చనిపోయిన వారందరూ మోక్షాన్ని పొందారని ఆయన అన్నారు. కాబట్టి, ఎక్కువ మంది బాబాలు, రాజకీయ నాయకులు, పెద్ద మొత్తంలో డబ్బు ఉన్నవారు కూడా సంగమంలో స్నానం చేసి అక్కడే మరణించాలి, తద్వారా మోక్షాన్ని పొందగలరు. నేను ఇలాంటి బాబాలకు మోక్షం రావాలని కోరుకుంటున్నాను,” అని పప్పూ యాదవ్ వ్యాఖ్యానించారు.
మహాకుంభ మేళా ఘటన: అధికారికంగా 30 మంది మృతి
జనవరి 29న ఉదయానికి, వేలాదిమంది భక్తులు ప్రయాగరాజ్‌లో సంగమ వద్ద మౌని అమావాస్య సందర్భంలో ద్వితీయ అమృత స్నానం చేయడానికి చేరుకున్నారు. జరిగిన తొక్కిసలాటలో కనీసం 30 మంది మరణించారని, 60 మంది గాయపడ్డారని ఉత్తరప్రదేశ్ ప్రభుత్వం అధికారికంగా వెల్లడించింది.
ఇలాంటి తొక్కిసలాట ఘటనలు గతంలోనూ జరిగాయని చెప్పిన పప్పూ యాదవ్, మాజీ ప్రధాని జవహర్‌లాల్ నెహ్రూ హయాంలోనూ మహాకుంభలో తొక్కిసలాట జరిగింది. కానీ అప్పుడు సరైన లెక్కలు ఉండేవి, ఆ కాలంలో సోషల్ మీడియా లేకపోయినా ప్రజలకు సమాచారం అందించేవారు. కానీ ఇప్పుడు ఇంత అభివృద్ధి చెందిన టెక్నాలజీ ఉన్నా, 300-600 మృతదేహాలను గోప్యంగా తీసుకెళ్లి అంత్యక్రియలు కూడా చేయలేదని అక్కడి ప్రజలు చెబుతున్నారు,” అని విమర్శించారు.
పార్లమెంటులో రగడ
మహాకుంభ మేళా ఘటనపై పార్లమెంట్‌లో నిరంతరం రగడ కొనసాగుతోంది. ప్రధానమంత్రి నరేంద్ర మోదీ, ఉత్తరప్రదేశ్ ముఖ్యమంత్రి యోగి ఆదిత్యనాథ్‌లపై ప్రతిపక్ష సభ్యులు నినాదాలు చేశారు. సమాజ్‌వాది పార్టీ అధినేత అఖిలేశ్ యాదవ్ ఈ ఘటనలో అసలు మరణించిన వారి సంఖ్యను ప్రభుత్వం దాచిపెడుతోందని ఆరోపించారు. మహాకుంభ నిర్వహణలో జరిగిన “కోవర్-అప్” పై కఠినమైన చర్యలు తీసుకోవాలని డిమాండ్ చేశారు. కాంగ్రెస్ అధ్యక్షుడు మల్లికార్జున ఖర్గే సహా పలువురు ప్రతిపక్ష నేతలు ఈ ఘటనలో మృతుల వివరాలతో కూడిన పూర్తి జాబితాను విడుదల చేయాలని ప్రభుత్వాన్ని కోరారు.
తొక్కిసలాట వెనుక కుట్ర – బీజేపీ
ఇదిలా ఉంటే, అధికార భారతీయ జనతా పార్టీ (బీజేపీ) ఈ ఘటన వెనుక కుట్ర ఉందని అనుమానం వ్యక్తం చేసింది. “దుస్థితి జరిగిన నేపథ్యంలో, దానికి బాధ్యులైన వారిపై పూర్తి స్థాయిలో దర్యాప్తు జరిపి చర్యలు తీసుకుంటాం,” అని బీజేపీ నాయకులు తెలిపారు. మహాకుంభ మేళా ఘటనపై కేంద్రం యూపీ ప్రభుత్వం ఎలా స్పందిస్తాయనేది ఆసక్తిగా మారింది. ప్రస్తుతం ఈ అంశం భారతీయ రాజకీయ వర్గాల్లో తీవ్ర చర్చనీయాంశంగా మారింది.
