ఆంధ్రప్రదేశ్ రాష్ట్రానికి చెందిన భారతీయ జనతా పార్టీ (BJP) ఎంపీ దగ్గుబాటి పురందేశ్వరి అంతర్జాతీయ వేదికపై భారతదేశ వాణిని బలంగా వినిపించారు. ఈ మేరకు ఆమె తాజాగా నిర్వహించిన ఐక్యరాజ్యసమితి జనరల్ అసెంబ్లీ (UNGA) 80వ సమావేశంలో కీలక ప్రసంగం చేశారు. భారతీయ బృందానికి ప్రాతినిధ్యం వహించిన ఎంపీ పురందేశ్వరి అంతర్జాతీయంగా పలు ప్రధాన అంశాలపై భారత్ వైఖరిని స్పష్టం చేశారు.
గతేడాది ప్రధానమంత్రి నరేంద్ర మోదీ ఆధ్వర్యంలో ‘పార్లమెంటరీ దౌత్యం’లో భాగంగా, వివిధ పార్టీలకు చెందిన పార్లమెంటు సభ్యులతో నియమించబడిన విషయం తెలిసిందే. ఈ నేపథ్యంలో ఈ ఎంపీల బృందం న్యూయార్క్‌లో పర్యటించింది. ఈ సందర్భంగా శాంతి, భద్రత, మానవ హక్కులు, అభివృద్ధి, అంతర్జాతీయ సహకారం వంటి కీలక ప్రపంచ అంశాలపై చర్చించే ఈ ముఖ్య వేదికపై భారత్ తరఫున ఆమె కీలక ప్రసంగం చేశారు.
ప్రపంచ వేదికపై భారత్ వైఖరి:
ఐక్యరాజ్యసమితి సమావేశంలో, పురందేశ్వరి నాయకత్వంలోని భారత ప్రతినిధి బృందం అనేక కీలక అంతర్జాతీయ అంశాలపై దేశ వైఖరిని స్పష్టం చేసింది. ముఖ్యంగా, మయన్మార్ మానవ హక్కుల పరిస్థితిపై ఐక్యరాజ్యసమితి ప్రత్యేక నివేదికలో భారత్‌పై చేసిన “పక్షపాతపూరిత విశ్లేషణ”ను ఈ బృందంలోని ఎంపీలు బలంగా ఖండించారు.
మయన్మార్‌లో తక్షణమే హింసను ఆపివేయాలని, రాజకీయ ఖైదీలను విడుదల చేయాలని, మానవతా సహాయాన్ని నిరాటంకంగా అందించాలని, మరియు సమ్మిళిత రాజకీయ సంభాషణ జరగాలని భారత్ పట్టుబట్టింది. మయన్మార్ పరిస్థితి వలన సరిహద్దుల్లో తలెత్తుతున్న మాదక ద్రవ్యాలు, ఆయుధాలు మరియు మానవ అక్రమ రవాణా వంటి నేరాలు భారత్‌కు ఆందోళన కలిగిస్తున్నాయని ఈ బృందం వెల్లడించింది.
అంతర్జాతీయ సహకారం, సంస్కరణల ఆవశ్యకత:
ఐరాస (UN) వేదికపై పురందేశ్వరి, భారతదేశం యొక్క బలమైన, పరిణతి చెందిన ప్రజాస్వామ్య విలువలను ప్రపంచానికి చాటిచెప్పారు. ఐరాసలో సంస్కరణలు, ముఖ్యంగా ఐక్యరాజ్యసమితి భద్రతా మండలి (UNSC) కూర్పును మార్చాల్సిన ఆవశ్యకతపై భారత పార్లమెంటు సభ్యులు చర్చించారు. ప్రపంచంలోని అతిపెద్ద ప్రజాస్వామ్య దేశంగా, అంతర్జాతీయ వేదికలపై భారత్ యొక్క స్వరం బలంగా వినిపించడం ద్వారా ప్రపంచ సమస్యల పరిష్కారంలో చురుకైన పాత్ర పోషించాలన్న సంకల్పాన్ని ఈ పర్యటన ప్రతిబింబిస్తుంది.
