ప్రయాగ్‌రాజ్‌లోని సంగం ఒడ్డున జరుగుతున్న మహా కుంభమేళా సందర్భంగా..ఇప్పటి వరకూ వివిధ రంగాలలో సుమారు 12 లక్షల తాత్కాలిక ఉద్యోగాలు దొరికినట్లు స్థానిక మీడియా కథనాలు వెలువడుతున్నాయి. గ్లోబల్ టెక్, డిజిటల్ టాలెంట్ సొల్యూషన్స్ ప్రొవైడర్ అయిన.. ఎన్ఎల్బీ సర్వీసెస్ ఇంటర్నల్ డేటా విశ్లేషణతో పాటు ఇతర మార్గాల నుంచి వచ్చిన నివేదికల ఆధారంగా ఇది తెలుస్తోంది. జనవరి 13 నుంచి ఫిబ్రవరి 26 వరకు ప్రారంభమయ్యే మహా కుంభమేళాకు.. దాదాపు 40 కోట్ల మంది భక్తులు హాజరుకావచ్చని ఉత్తరప్రదేశ్ ప్రభుత్వం అంచనా వేస్తోంది.
సంగం ఒడ్డున జరిగిన ఈ చారిత్రాత్మక కుంభమేళా..దేశ ఆర్థికాభివృద్ధికి, తాత్కాలిక ఉపాధిలో ఒక శక్తి కేంద్రంగా అవతరించిందని ఆర్ధిక నిపుణులు చెబుతున్నారు. మహా కుంభమేళా ఆర్థిక ప్రభావం అనేక రంగాలకు విస్తరించిందని అంటున్నారు. మౌలిక సదుపాయాల అభివృద్ధితో పాటు, ఈవెంట్ మేనేజ్‌మెంట్, భద్రతా సేవలు, స్థానిక వ్యాపారాలు, పర్యాటకం, వినోదం, ఉద్యానవనాలు వంటి రంగాలు అలాగే సాంప్రదాయ, ఆధునిక వ్యాపారాలలో వృద్ధిని పెంచుతున్నాయని అంచనా వేస్తున్నారు
మహా కుంభమేళా సందర్భంగా పర్యాటక, ఆతిథ్య రంగంలోనే సుమారు 4.5 లక్షల తాత్కాలిక ఉద్యోగాలు సృష్టించబడ్డాయని అంచనా వేస్తున్నారు. వీటిలో హోటల్ సిబ్బంది, టూర్ గైడ్‌లు, పోర్టర్‌లు, ట్రావెల్ కన్సల్టెంట్‌లు, ఈవెంట్ కోఆర్డినేటర్‌లు వంటి టెంపరరీ ఉద్యోగాలు ఉన్నాయి. అదేవిధంగా రవాణా, లాజిస్టిక్స్ రంగంలో సుమారు మూడు లక్షల ఉద్యోగాలు దొరుకుతున్నాయి. వీటిలో డ్రైవర్లు, సరఫరా గొలుసు నిర్వాహకులు, కొరియర్ సిబ్బంది, ఇతర సహాయక సిబ్బంది స్థానాలు ఉన్నాయి.
జనవరి 13 నుంచి ఫిబ్రవరి 26 వరకు జరుగుతున్న మహా కుంభమేళాలో సందర్భంగా ఏర్పాటు చేసిన తాత్కాలిక వైద్య శిబిరాల్లో దాదాపు 1.5 లక్షల మంది ఫ్రీలాన్స్ నర్సులు, పారామెడికల్ సిబ్బంది , అనుబంధ ఆరోగ్య సంరక్షణ నిపుణులు టెంపరరీ ఉద్యోగులుగా నియమించబడ్డారు. అంతేకాదు టీవీ, సోషల్ మీడియా, న్యూస్ పేపర్లు వంటివాటికి డిమాండ్ పెరిగిందని, దీనికి దాదాపు రెండు లక్షల మంది నిపుణులు అవసరమవుతున్నారని అంటున్నారు.
అంతేకాకుండా మహాకుంభమేళాకు వచ్చే భక్తుల అవసరాలను తీర్చే రిటైల్ వ్యాపారాలు, స్ట్రీట్ వెండర్స్ లో దాదాపు లక్షకు పైగానే ఉపాధి పొందుతున్నారు. మతపరమైన వస్తువులు, సావనీర్లు, లోకల్ బ్రాండు ఉత్పత్తుల డిమాండ్‌ను తీర్చడానికి రిటైల్ వ్యాపారాలు గ్రౌండ్-లెవల్ సేల్స్, కస్టమర్ సపోర్ట్ గురించి కూడా చాలామంది ఉద్యోగులను నియమించారు.
