ఒక న్యాయమూర్తి ఇంట్లో అగ్ని ప్రమాదం జరిగిన ఘటన పెద్ద ఎత్తున సంచలనాన్ని సృష్టించింది. ఢిల్లీ హైకోర్టు న్యాయమూర్తి జస్టిస్ యశ్వంత్ వర్మ అధికారిక నివాసంలో ఇటీవల మంటలు చెలరేగాయి. ఆయన నగరంలో లేని సమయంలో ఈ ఘటన జరగగా, కుటుంబ సభ్యులు వెంటనే ఫైర్ సిబ్బందికి సమాచారం అందించారు. మంటలు ఆర్పేందుకు వచ్చిన అగ్నిమాపక సిబ్బంది, అక్కడ కనిపించిన దృశ్యాన్ని చూసి షాక్ కు గురయ్యారు. ఇంటి లోపల పెద్దఎత్తున నోట్ల కట్టలు కనిపించడంతో, ఇది లెక్క చూపని డబ్బు కావచ్చని అధికారులు అనుమానిస్తున్నారు.
అగ్నిప్రమాదం తర్వాత ఫైర్ సిబ్బంది, పోలీసులు ఇంటిని తనిఖీ చేయగా కోట్లు విలువైన నగదు బయటపడింది. ఈ సమాచారం సుప్రీంకోర్టు ప్రధాన న్యాయమూర్తి సంజీవ్ ఖన్నా దృష్టికి వెళ్లడంతో, వెంటనే కొలీజియం సమావేశం ఏర్పాటు చేశారు. అనంతరం జస్టిస్ వర్మను తిరిగి అలహాబాద్ హైకోర్టుకు బదిలీ చేయాలని నిర్ణయించారు.
కోర్టు స్పందన – న్యాయ వ్యవస్థ ప్రతిష్టకు సవాలు
ఈ వ్యవహారం న్యాయవర్గాల్లో కలకలం రేపగా, జస్టిస్ వర్మపై దర్యాప్తు ప్రారంభం అయ్యే అవకాశముంది. కొలీజియంలో కొంతమంది న్యాయమూర్తులు, బదిలీ మాత్రమే కాకుండా అభిశంసన చర్యలు తీసుకోవాలన్న అభిప్రాయాన్ని వ్యక్తం చేశారు. ఆయన స్వచ్ఛంద రాజీనామా చేయాలని సూచించగా, అలా జరగకపోతే పార్లమెంటులో అభిశంసన తీర్మానం ప్రవేశపెట్టే అవకాశం ఉందని సమాచారం.
భారత న్యాయవ్యవస్థలో నిబంధనలు ఏమి చెబుతున్నాయి?
హైకోర్టు లేదా సుప్రీంకోర్టు న్యాయమూర్తిపై అవినీతి లేదా దుష్ప్రవర్తన ఆరోపణలు వస్తే, 1999లో రూపొందించిన అంతర్గత విధాన ప్రకారం, ముందు ప్రధాన న్యాయమూర్తి నిందిత న్యాయమూర్తి నుండి వివరణ కోరతారు. అవసరమైతే, ఒక ప్రత్యేక విచారణ కమిటీ ఏర్పాటవుతుంది. దర్యాప్తు అనంతరం, సంబంధిత న్యాయమూర్తిని తన స్థానాన్ని వదిలిపెట్టమని సూచించాలి లేక అభిశంసనను ఎదుర్కొనాలి.
జస్టిస్ వర్మ – న్యాయ జీవిత ప్రయాణం
1969 జనవరిలో అలహాబాద్ లో జన్మించిన జస్టిస్ యశ్వంత్ వర్మ, ఢిల్లీ విశ్వవిద్యాలయం నుండి బి.కామ్ పూర్తిచేశారు. అనంతరం ఎల్‌ఎల్‌బి చేసి, 1992లో న్యాయవాద వృత్తిని ప్రారంభించారు. 2014లో అలహాబాద్ హైకోర్టు అదనపు న్యాయమూర్తిగా, 2016లో శాశ్వత న్యాయమూర్తిగా నియమితులయ్యారు. 2021లో ఢిల్లీ హైకోర్టుకు బదిలీ అయిన ఆయన, వివిధ ముఖ్యమైన తీర్పులను వెలువరించారు.
జస్టిస్ వర్మ తీసుకున్న కీలక నిర్ణయాలు
కాంగ్రెస్ పార్టీ ఆదాయపు పన్ను పునః మూల్యాంకనం: కాంగ్రెస్ పార్టీ దాఖలు చేసిన పిటిషన్‌ను తిరస్కరించారు.
ట్రయల్ బై ఫైర్ వెబ్ సిరీస్ నిషేధం: ఈ సిరీస్‌ను నిలిపివేయాలంటూ వచ్చిన పిటిషన్‌ను ఆయన తిరస్కరించారు.
పన్నులు, పారిశ్రామిక, కార్పొరేట్, రాజ్యాంగ అంశాలపై తీర్పులు ఇచ్చారు.
ముందు ఏమవుతుంది?
ఈ ఘటనపై రాజ్యసభలో తీవ్ర చర్చ జరుగుతోంది. జస్టిస్ వర్మ రాజీనామా చేస్తారా? లేక నేరుగా అభిశంసనను ఎదుర్కొంటారా? అన్నది ఆసక్తిగా మారింది. న్యాయవ్యవస్థపై ప్రజల నమ్మకాన్ని పెంచేలా, ఈ వ్యవహారంపై సుప్రీంకోర్టు ఎలా స్పందిస్తుందో చూడాలి.
