రంగారెడ్డి జిల్లా చేవెళ్ల మండలంలో ఆర్టీసీ బస్సు-టిప్పర్ ఢీకొన్న ఘోర రోడ్డు ప్రమాదంపై దేశ ప్రధాని నరేంద్ర మోదీ, తెలంగాణ ముఖ్యమంత్రి ఎ. రేవంత్ రెడ్డి తీవ్ర దిగ్భ్రాంతి వ్యక్తం చేశారు. ఈ దుర్ఘటనలో ఇప్పటికే 24 మంది మృతి చెందగా, మరో 15 మంది గాయపడ్డారు. ఈ సందర్భంగా మృతుల కుటుంబాలకు అండగా ఉంటామని హామీ ఇచ్చారు.
సీఎం రేవంత్ రెడ్డి ఆదేశాలు
ప్రమాదం జరిగిన వెంటనే స్పందించిన సీఎం రేవంత్ రెడ్డి తీవ్ర విచారం వ్యక్తం చేశారు. ఆయన అధికారులకు పలు కీలక ఆదేశాలు జారీ చేశారు.
సహాయక చర్యలు: అధికారులు వెంటనే ప్రమాద స్థలానికి చేరుకుని, అవసరమైన సహాయక చర్యలను ముమ్మరం చేయాలని ఆదేశించారు.
క్షతగాత్రుల తరలింపు: ప్రమాదంలో గాయపడిన వారందరినీ వెంటనే హైదరాబాద్కు తరలించి మెరుగైన వైద్య చికిత్స అందించేలా ఏర్పాట్లు చేయాలని డీజీపీలను ఆదేశించారు.
క్షేత్రస్థాయి పర్యవేక్షణ: అందుబాటులో ఉన్న మంత్రులు వెంటనే ప్రమాద సంఘటనకు చేరుకోవాలని పేర్కొన్నారు. జిల్లా కలెక్టర్‌‌కు అవసరమైన అన్ని చర్యలు తీసుకోవాలని సూచించారు.
వివరాలు: ప్రమాదానికి సంబంధించిన పూర్తి వివరాలు ఎప్పటికప్పుడు తెలియజేయాలని రేవంత్ రెడ్డి అధికారులను ఆదేశించారు.
పీఎం మోదీ సంతాపం
మరోవైపు, ఈ ఘోర ప్రమాదంపై ప్రధానమంత్రి నరేంద్ర మోదీ సైతం దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి వ్యక్తం చేసిన ఆయన, ఈ దు:ఖ సమయంలో వారికి ప్రభుత్వం అండగా ఉంటుందని భరోసా ఇచ్చారు. మృతుల కుటుంబాలకు రూ.2 లక్షలు చొప్పున ఎక్స్ గ్రేషియాను ప్రకటించిన ఆయన, గాయపడ్డవారికి రూ.50 వేల అందించనున్నట్టు తెలిపారు. బాధితులకు సత్వర వైద్య సహాయం అందించాలని అధికారులను ఆదేశించారు.
ఇక ఈ ఘటనపై ప్రతిపక్ష బీఆర్ఎస్ పార్టీ స్పందించింది. మాజీ ముఖ్యమంత్రి కేసీఆర్, మంత్రులు కేటీఆర్ మరియు హరీశ్ రావు తదితరులు ప్రమాదంపై సానుభూతి వ్యక్తం చేశారు.
టీపీసీసీ చీఫ్ ఆవేదన:
టీపీసీసీ అధ్యక్షులు మహేష్ కుమార్ గౌడ్ కూడా ప్రమాదంపై తీవ్ర దిగ్భ్రాంతి వ్యక్తం చేశారు. అధికారులను అడిగి వివరాలు తెలుసుకున్నారు. గాయపడిన వారికి తగిన వైద్య చికిత్సలు అందించాలని, అవసరమైన సహాయక చర్యలు చేపట్టాలని అధికారులను కోరారు. అనంతరం మృతులకు ప్రగాఢ సంతాపం తెలియజేశారు.
