ఎన్నో అనారోగ్య సమస్యలను దూరం చేసే మెడిసిన్ వంటింట్లోనే ఉంటాయి. ముఖ్యంగా అందరి వంటింట్లో ఉండే లవంగాలను చాలా మంది కేవలం వంటలకు మాత్రమే ఉపయోగిస్తారు. కానీ లవంగాలను ఉదయం పూట నమలడం లేదా టీకి బదులు లవంగాల నీరు తాగడం వల్ల శరీరానికి ఎన్నో ఆరోగ్య ప్రయోజనాలు ఉన్నాయని నిపుణులు అంటున్నారు.
కొంతమంది జీర్ణసంబంధిత సమస్యలతో బాధ పడుతుంటారు. మలబద్ధకం, కడుపుబ్బరం, గ్యాస్, ఎసిడిటీ వంటి సమస్యలతో ఇబ్బంది పడుతుంటారు. అలాంటి వారికి లవంగాలు మంచి మెడిసిన్ రోజూ ఉదయం పూట లవంగాలను తినడం వల్ల కానీ, వాటిని నీటిలో ఉడికించి ఆ నీటిని తీసుకోవడం వల్ల కానీ ఈ సమస్య నుంచి బయటపడతారు. లవంగాలలో ఉండే యాంటీ ఇన్‌ఫ్లమేటరీ గుణాలు కడుపు సమస్యలను క్లియర్ చేస్తాయి.
కొందరు ఎన్నిసార్లు బ్రష్ చేసినా కూడా వారి నోరు దుర్వాసన వస్తుంటుంది. ఇలాంటివారు పరగడపున అంటే ఖాళీ కడుపుతో లవంగాలు నమలడం లేదా వాటర్ తాగడం వల్ల నోటిలోని బ్యాక్టీరియా చనిపోయి.. నోటి దుర్వాసన రాకుండా ఉంటుంది.
బరువు తగ్గాలని అనుకున్న వాళ్లు కూడా లవంగాల నీరు తాగడం వల్ల ఈజీగా బరువు తగ్గుతారు. ఇంకా చెప్పాలంటే లవంగాల వల్ల ఆరోగ్యకరంగా బరువు తగ్గుతారు. దీనిలోని యాంటీ ఆక్సిడెంట్లు శరీర బరువును తగ్గించడంలో ముఖ్యపాత్ర పోషిస్తాయి. రోజూ ఉదయం కాఫీ, టీ తాగే బదులు లవంగాలు టీని తాగడం వల్ల ఈజీగా వెయిట్ తగ్గుతారు.
లవంగాల్లో యాంటీ ఆక్సిడెంట్లు, యాంటీ ఇన్‌ఫ్లమేటరీ, యాంటీ మైక్రోబయల్ లక్షణాలు అధికంగా ఉండటం వల్ల ఇవి శరీరంలో రోగనిరోధక శక్తిని పెంచుతాయి. అలాగే జలుబు, దగ్గు వంటి ఇన్ఫెక్షన్లు రాకుండా ఉండాలంటే ఈ లవంగాల నీటిని తాగితే బెటరని నిపుణులు అంటున్నారు. వీటితో పాటు దీర్ఘకాలిక వ్యాధుల నుంచి లవంగాలు విముక్తి కలిగిస్తాయి.
ఇప్పుడు ఎవరిని చూసినా వారిలో చాలా మంది డయాబెటిస్ సమస్యలతో ఇబ్బంది పడుతున్నవారే కనిపిస్తున్నారు. అలాంటి వారు రోజూ ఉదయం లవంగాలు తినడం లేదా లవంగాల టీని తాగడం వల్ల రక్తంలో చక్కెర స్థాయిలు అదుపులో ఉంటాయి. లవంగాలలోని పోషకాలు డయాబెటిస్ సమస్యను దూరం చేయడంలో ముఖ్య పాత్ర పోషిస్తాయి.
