డైరెక్టర్ శంకర్ దర్శకత్వంలో గ్లోబల్ స్టార్ రామ్ చరణ్ నటిస్తున్న ‘గేమ్ ఛేంజర్’ సినిమాపై ప్రేక్షకుల్లో భారీ అంచనాలు నెలకొన్నాయి. నిర్మాత దిల్ రాజు భారీ బడ్జెట్‌తో నిర్మిస్తున్న ఈ సినిమాలో బాలీవుడ్ బ్యూటీ కియారా అద్వానీ కథానాయికగా నటిస్తుండగా, ఎస్‌జే సూర్య విలన్ పాత్రలో కనిపించనున్నారు. అంజలి, శ్రీకాంత్, సముద్రఖని వంటి ప్రముఖ నటులు కీలక పాత్రల్లో అలరించనున్నారు.
ప్రమోషన్లలో చరణ్, బాలయ్య సెన్సేషన్
సినిమా ప్రమోషన్లలో భాగంగా రామ్ చరణ్, నిర్మాత దిల్ రాజు నందమూరి బాలకృష్ణ హోస్ట్ చేస్తున్న అన్ స్టాపబుల్ టాక్ షోలో పాల్గొన్నారు. చరణ్ తల్లి, నాన్నమ్మ వీడియో కాల్ ద్వారా సందేశాలు ఇచ్చారు. చరణ్ తన కూతురు క్లింకార గురించి మాట్లాడుతూ భావోద్వేగానికి లోనయ్యాడు. “మా పాప నాన్న అని పిలిచిన రోజు ఫోటో రివీల్ చేస్తాను” అని చెప్పడం అందరినీ ఆకట్టుకుంది.
ఈ టాక్ షోలో చరణ్, బాలయ్య సరదా సంభాషణలు, ప్రభాస్‌తో ఫోన్‌లో మాట్లాడే ఘట్టం ప్రేక్షకులను విశేషంగా ఆకట్టుకున్నాయి. అలాగే నిర్మాతలు పంపిన లెటర్ ద్వారా 2025 నాటికి వారసుడిని కోరుకుంటున్నట్లు తెలిపారు.
రెమ్యూనరేషన్ తగ్గించుకున్న రామ్ చరణ్
‘ఆర్ఆర్ఆర్’ సినిమా ఘన విజయం తర్వాత రామ్ చరణ్ ఇండస్ట్రీలో అత్యధిక పారితోషికం తీసుకుంటున్న నటుల్లో ఒకరిగా మారాడు. కానీ ‘గేమ్ ఛేంజర్’ బడ్జెట్ పెరిగిపోవడం వల్ల తన పారితోషికాన్ని తగ్గించుకోవడానికి ముందుకు వచ్చాడు. మొదట రూ. 100 కోట్ల ఒప్పందం ఉన్నా, నిర్మాతల కోసం రూ. 65 కోట్లకే పరిమితమయ్యాడు.
ఇక డైరెక్టర్ శంకర్ కూడా తన రెమ్యూనరేషన్ తగ్గించుకుని రూ. 35 కోట్లకే సర్దుకుపోయాడు. ఈ ఉదారతకు ఇండస్ట్రీ మొత్తం ప్రశంసలు కురిపిస్తోంది.
సంక్రాంతి కానుకగా విడుదల
ఈ సినిమాను జనవరి 10న తెలుగు, తమిళం, కన్నడ, మలయాళం, హిందీ భాషల్లో విడుదల చేయనున్నారు. ఇప్పటికే విడుదలైన ట్రైలర్ ప్రేక్షకులను ఆకట్టుకోగా, రాజమండ్రిలో జనవరి 4న ప్రీ రిలీజ్ ఈవెంట్‌ను గ్రాండ్‌గా నిర్వహించారు.
భారీ బడ్జెట్ సినిమాగా ‘గేమ్ ఛేంజర్’ సంక్రాంతి బరిలో దిగనుంది. రామ్ చరణ్, శంకర్ కాంబినేషన్ ఫ్యాన్స్‌లో ప్రత్యేక ఉత్సాహాన్ని రేకెత్తిస్తోంది. ఈ సినిమా దక్షిణాది మాత్రమే కాకుండా పాన్ ఇండియా లెవెల్‌లో క్రేజ్‌ను తెచ్చుకుంటుంది.
