హైదరాబాద్ వాసులు బుల్లెట్ రైలు ఎక్కే రోజులు ఎంతో దూరంలో లేవు. దేశంలోని ప్రధాన నగరాలను హై-స్పీడ్ రైలు నెట్‌వర్క్ ద్వారా అనుసంధానించే ప్రతిష్టాత్మక ప్రాజెక్టులో మరో కీలక అడుగు పడింది. రైల్వే ఇటీవల హైదరాబాద్-ముంబై మధ్య 709 కిలోమీటర్ల మేర హై-స్పీడ్ కారిడార్ నిర్మించాలని నిర్ణయించింది. ఈ కారిడార్‌ను బెంగళూరు వరకు విస్తరించాలన్న యోచన కూడా ఉంది. అదనంగా, మైసూరు-చెన్నై మధ్య నిర్మించ తలపెట్టిన హై-స్పీడ్ రైలు కారిడార్‌ను కూడా హైదరాబాద్ వరకు విస్తరించాలని చర్చలు జరుగుతున్నాయి. ఈ ప్రణాళికలు అమలులోకి వస్తే, హైదరాబాద్, ముంబై, చెన్నై, బెంగళూరుకు మధ్య ప్రయాణ సమయం గణనీయంగా తగ్గిపోతుంది.
ప్రస్తుతం ముంబై-అహ్మదాబాద్ మధ్య జపాన్ సాంకేతికత మరియు ఆర్థిక సహాయంతో హై-స్పీడ్ కారిడార్ నిర్మించబడుతోంది. ఈ మార్గంలో జపాన్ తయారీ బుల్లెట్ రైలు నడిచే అవకాశం ఉంది. తదుపరి దశలో మరిన్ని హై-స్పీడ్ కారిడార్లు నిర్మించేందుకు ప్రణాళికలు ఉన్నాయి. వాటిలో హైదరాబాద్-ముంబై, హైదరాబాద్-బెంగళూరు, హైదరాబాద్-చెన్నై మార్గాలు కూడా ఉంటాయి. ఈ మార్గాల్లో కొన్ని భాగాల్లో ఎలివేటెడ్, భూగర్భ ట్రాక్‌లు ఉపయోగించబోతున్నారు.
హైదరాబాద్-బెంగళూరు మధ్య దూరం 618 కిలోమీటర్లది. ప్రస్తుతం సూపర్‌ఫాస్ట్ ఎక్స్‌ప్రెస్‌లు 11 గంటలు, వందేభారత్ 8.5 గంటల సమయం తీసుకుంటున్నాయి. అయితే, బుల్లెట్ రైలు అందుబాటులోకి వస్తే, కేవలం 2 గంటల్లోనే బెంగళూరుకు చేరుకోవచ్చు. అలాగే, హైదరాబాద్-చెన్నై మార్గం 757 కిలోమీటర్ల దూరం. సాధారణ ఎక్స్‌ప్రెస్‌లు 15 గంటలు పడతాయి, కానీ బుల్లెట్ రైలు ద్వారా ఈ సమయం 2.5 గంటలకు తగ్గిపోతుంది.
ఈ ప్రాజెక్టులు పూర్తయ్యేందుకు 10 నుంచి 13 సంవత్సరాలు పడవచ్చని రైల్వే అధికారులు అంచనా వేస్తున్నారు. అయితే, ప్రాజెక్టు పూర్తి అయిన తర్వాత హైదరాబాద్, ముంబై, చెన్నై, బెంగళూరుకు మధ్య ప్రయాణ సమయాన్ని గణనీయంగా తగ్గించగలదు. ఇది ప్రయాణికుల సమయాన్ని ఆదా చేస్తే, వ్యాపారం మరియు ఆర్థిక వ్యవస్థను మరింత వేగంగా ముందుకు తీసుకెళ్లగలదు.
