భారత ప్రధాని నరేంద్ర మోదీ అమెరికా పర్యటనలో భాగంగా గురువారం అమెరికా అధ్యక్షుడు డొనాల్డ్ ట్రంప్‌తో భేటీ అయ్యారు. ఈ సమావేశం వైట్ హౌస్‌లో జరిగింది. వీరి మధ్య రక్షణ, వాణిజ్య, అక్రమ వలసలు, సుంకాలు వంటి అంశాలపై చర్చ జరిగింది. భేటీ అనంతరం ప్రధాని మోదీ తన ఎక్స్ ఖాతాలో “MAGA+MIGA=MEGA” అనే ఆసక్తికర ఈక్వేషన్‌ను పోస్ట్ చేశారు. MAGA అంటే Make America Great Again, MIGA అంటే Make India Great Again అని అర్థం. మోదీ ఈ సందేశంతో భారత్-అమెరికా భాగస్వామ్యం మెరుగుపడుతుందని, ఇది రెండు దేశాల శ్రేయస్సుకు ఉపయోగపడుతుందని పేర్కొన్నారు.
ఈ సమావేశంలో అక్రమ వలసలపై కూడా ప్రధాని మోదీ కీలక వ్యాఖ్యలు చేశారు. అమెరికాకు అక్రమంగా వలస వెళ్లిన భారతీయులను తాము స్వదేశానికి తీసుకువెళ్తామని ప్రకటించారు. యువతను మోసం చేసి అక్రమంగా అమెరికాకు పంపిస్తున్న మనుషుల అక్రమ రవాణాను అరికట్టాలని పిలుపునిచ్చారు.
ట్రంప్, మోదీ భేటీలో వాణిజ్య అంశాలు కూడా ప్రస్తావనకు వచ్చాయి. ట్రంప్ మాట్లాడుతూ, భారత్ తన ఉత్పత్తులపై భారీ సుంకాలు విధిస్తోందని, అందుకే తాము కూడా భారత్ దిగుమతులపై ట్యారిఫ్‌లు పెంచుతామని తెలిపారు. 2030 నాటికి రెండు దేశాల వాణిజ్య పరిమాణాన్ని 500 బిలియన్ డాలర్లకు తీసుకెళ్లాలని నిర్ణయించారు. అలాగే, టెక్నాలజీ మార్పిడి, సంయుక్త ఉత్పత్తి, సంయుక్త అభివృద్ధిపై సహకారం కొనసాగించనున్నారు. ఈ సమావేశంలో భారత విదేశాంగ మంత్రి జైశంకర్, నేషనల్ సెక్యూరిటీ అడ్వైజర్ అజిత్ దోవల్ కూడా పాల్గొన్నారు.
ట్రంప్ మోదీకి ప్రత్యేక బహుమతి అందజేశారు. “మిస్టర్ ప్రైమ్ మినిస్టర్ యూ ఆర్ గ్రేట్” అంటూ రాసి స్వహస్తాలతో సంతకం చేసి “అవర్ జర్నీ టుగెదర్” అనే పుస్తకాన్ని బహుమతిగా ఇచ్చారు. ఈ పుస్తకంలో 2019లో “హౌడీ మోడీ” కార్యక్రమం, 2020లో “నమస్తే ట్రంప్” కార్యక్రమంలో దిగిన ఫొటోలు ఉన్నాయి. మోదీ ఈ బహుమతిని చూసి చాలా ఆనందించారు.
ట్రంప్ మాట్లాడుతూ, మోదీ తన మంచి స్నేహితుడని, భారత ప్రధానికి ఆతిథ్యం ఇవ్వడం గౌరవంగా భావిస్తున్నట్లు తెలిపారు. మోదీ కూడా ట్రంప్‌ను ప్రశంసిస్తూ, దేశ ప్రయోజనాలకు అత్యున్నత ప్రాధాన్యత ఇవ్వాలని ట్రంప్ నుంచి నేర్చుకున్నానని అన్నారు.
ఈ పర్యటన ద్వైపాక్షిక సంబంధాలను బలోపేతం చేయడంలో కీలకంగా నిలిచింది. రక్షణ, వాణిజ్యం, వలసలు, టెక్నాలజీ మార్పిడి తదితర అంశాల్లో రెండు దేశాల మధ్య సహకారం మరింత పెరిగే అవకాశం ఉంది.
