హైదరాబాద్‌లో క్రికెట్ వర్గాల్లో హల్‌చల్‌ సృష్టిస్తున్న వివాదం – హైదరాబాద్ క్రికెట్ అసోసియేషన్ (HCA) మరియు సన్‌రైజర్స్ హైదరాబాద్ (SRH) మధ్య ఉచిత టికెట్ల అంశం చుట్టూ ముదిరింది. SRH అధికారికంగా ఆరోపిస్తూ, గత రెండేళ్లుగా HCA అధికారి ఉచిత టికెట్ల కోసం ఒత్తిడి తీసుకువస్తున్నారని, వారి హక్కులను కాలరాస్తున్నారని చెబుతోంది. తాజాగా, మార్చి 27న జరిగిన లక్నో సూపర్ జెయింట్స్ మ్యాచ్ సందర్భంగా, HCA ఒక కార్పొరేట్ బాక్స్‌ను తాళం వేసి, అదనపు టికెట్లు ఇవ్వకుంటే తెరవమని బెదిరించిందని SRH పేర్కొంది.
ఇలాంటి సంఘటనలు పునరావృతమైతే తమ హోమ్ గ్రౌండ్‌ను వేరే వేదికకు మార్చుకుంటామని SRH హెచ్చరించింది. దీనిపై HCA స్పందిస్తూ, ఈ ఆరోపణలను ఖండించింది. SRH నుంచి ఎలాంటి అధికారిక ఈ-మెయిల్ రాలేదని, సోషల్ మీడియాలో వస్తున్న వార్తలు అసత్యమని పేర్కొంది. ఒప్పందం ప్రకారం HCAకు 10% ఉచిత టికెట్లు (సుమారు 3,900) కేటాయించాల్సి ఉంటుంది. అయితే ఈసారి F12A కార్పొరేట్ బాక్స్ సామర్థ్యం 30 సీట్లుగా నిర్ణయించగా, అదనంగా 20 సీట్లు మరో బాక్స్‌లో కోరినట్లు తెలుస్తోంది. ఈ డిమాండ్‌ను SRH తిరస్కరించడంతో, HCA చర్యలు తీసుకున్నట్లు SRH ఆరోపిస్తోంది.
ఈ వివాదంపై తెలంగాణ ప్రభుత్వం జోక్యం చేసుకుంది. సీఎం రేవంత్ రెడ్డి SRHకు మద్దతుగా నిలిచారు. HCAపై విచారణ జరిపించేందుకు విజిలెన్స్ అధికారులను ఆదేశించారు. గతంలోనూ అవినీతి ఆరోపణలు ఎదుర్కొన్న HCA, ఇప్పుడు మరింత ఒత్తిడిని ఎదుర్కొంటోంది. ఈ వివాదం త్వరగా పరిష్కారం కానట్లయితే, హైదరాబాద్ క్రికెట్ ప్రతిష్ఠకు పెద్ద దెబ్బ తగలొచ్చు. SRH తమ హోమ్‌గ్రౌండ్‌ను కోల్పోతే, అది నగరం ఇమేజ్‌పైనా ప్రభావం చూపించే అవకాశం ఉంది. BCCI ఈ వివాదాన్ని తీవ్రంగా పరిగణిస్తే, HCAపై చర్యలు తీసుకోవచ్చు లేదా SRHకి తాత్కాలికంగా మరో వేదికను కేటాయించవచ్చు.
