పైరసీని అరికట్టేందుకు తెలంగాణ పోలీసులు చేస్తున్న కృషిని ఏపీ ఉప ముఖ్యమంత్రి, జనసేన అధినేత పవన్ కల్యాణ్ అభినందించారు. పైరసీలో కీలకంగా ఉన్న ఐబొమ్మ (iBomma), బప్పమ్ (Bappam) వెబ్‌సైట్ల నిర్వాహకుడిని అరెస్ట్ చేసి, వాటిని మూయించి వేసిన హైదరాబాద్ పోలీసులు మరియు సిటీ కమిషనర్ వి.సి. సజ్జనార్కు ఆయన ఓ లేఖ ద్వారా కృతజ్ఞతలు తెలియజేశారు.
లేఖలోని ముఖ్యాంశాలు
-
చిత్ర పరిశ్రమ నష్టం: సినిమాలు విడుదలైన రోజునే ఇంటర్నెట్‌లో పోస్ట్ చేస్తున్న పైరసీ ముఠాల వల్ల చిత్ర పరిశ్రమ సృజనాత్మకతనే కాక, ఆర్థికంగా తీవ్రంగా నష్టపోతోందని పవన్ కల్యాణ్ ఆవేదన వ్యక్తం చేశారు.
-
స్వాగతించదగిన పరిణామం: పోలీసులకు సవాల్ విసిరే స్థాయికి పైరసీ ముఠాలు చేరుకున్న తరుణంలో, హైదరాబాద్ సైబర్ క్రైం పోలీసు బృందం ఐబొమ్మ, బప్పమ్ నిర్వాహకుడిని అరెస్ట్ చేసి, వారితోనే సైట్లను మూయించివేయడం స్వాగతించదగిన పరిణామం అని పేర్కొన్నారు.
-
సజ్జనార్ కృషి: సీపీ సజ్జనార్ నేతృత్వంలో చేపట్టిన ఈ ఆపరేషన్ విజయవంతమైందని, ఈ కృషి తెలుగు సినిమాకే కాదు, యావత్ భారతీయ చిత్ర పరిశ్రమకు మేలు చేస్తుందని పవన్ కల్యాణ్ ప్రశంసించారు.
బెట్టింగ్, పొంజీ స్కీమ్స్‌పై స్పందన..
సజ్జనార్ కేవలం పైరసీపైనే కాకుండా, బెట్టింగ్ మాఫియా, పొంజీ స్కీమ్స్‌పై ప్రత్యేక దృష్టి కేంద్రీకరించడంపైనా పవన్ కల్యాణ్ స్పందించారు.
-
చైతన్యం: పొంజీ స్కీమ్స్ మూలంగా ప్రజలు ఆర్థికంగా మోసానికి గురై నష్టపోతున్న విధానంపై సజ్జనార్ చైతన్య పరుస్తున్నారని తెలిపారు.
-
కదలిక: బెట్టింగ్ యాప్స్‌ను నియంత్రించేందుకు సజ్జనార్ చేపట్టిన కార్యక్రమం అన్ని రాష్ట్రాల్లోనూ కదలిక తీసుకువచ్చిందని పవన్ కల్యాణ్ కొనియాడారు.
