మైక్రోసాఫ్ట్ సహ వ్యవస్థాపకుడు బిల్ గేట్స్ ఇటీవల భారత్ పర్యటనలో ఉన్నారు. ఇది ఇటీవల కాలంలో ఆయన మూడోసారి భారతదేశాన్ని సందర్శించడం. పర్యటనలో భాగంగా ఆయన పలువురు కేంద్ర మంత్రులు, రాష్ట్ర ముఖ్యమంత్రులను కలుసుకుని వివిధ అంశాలపై చర్చించారు. ఈ అనుభవాన్ని GatesNotes.comలో పంచుకున్న గేట్స్, భారతదేశ ప్రజల తెలివితేటలు, సమస్యలను పరిష్కరించే కొత్త మార్గాలపై ఆసక్తిగా ఉన్నారని పేర్కొన్నారు.
ఈ పర్యటనలో ఆయన ప్రముఖ క్రికెట్ లెజెండ్ సచిన్ టెండూల్కర్ ను కలుసుకున్నారు. ముంబైలో వీరిద్దరూ ఒకే బంచ్‌పై కూర్చొని ఫేమస్ స్ట్రీట్ ఫుడ్ వడాపావ్ తింటూ సమయం గడిపారు. ఈ అనుభవాన్ని బిల్ గేట్స్ తన ఇన్‌స్టాగ్రామ్ ఖాతాలో పంచుకున్నారు. “పని ముందు చిన్న విరామం – వడాపావ్ బ్రేక్!” అంటూ క్యాప్షన్ ఇచ్చిన వీడియో నెట్టింట్లో వైరల్‌గా మారింది. ఈ వీడియోలో “సర్వింగ్ వెరీ సూన్” అనే క్యాప్షన్ కూడా ఉండడం విశేషం.
గేట్స్, సచిన్ లా ఈ సరదా మూమెంట్ అభిమానులను ఆకర్షించింది. ప్రముఖ మాజీ క్రికెటర్లు యువరాజ్ సింగ్, శిఖర్ ధావన్ ఈ పోస్ట్‌ను లైక్ చేశారు. ఈ వీడియోపై నెటిజన్లు రకరకాలుగా స్పందిస్తూ “టెక్ గురు & క్రికెట్ లెజెండ్ – అదిరిపోయిన కాంబినేషన్”, “వడాపావ్ కూడా ఇంటర్నేషనల్ అవుతోంది” అంటూ కామెంట్స్ పెడుతున్నారు.
ఇదే కాకుండా, 2023లో తొలిసారి బిల్ గేట్స్ సచిన్ టెండూల్కర్ కుటుంబాన్ని కలుసుకున్నారు. ఆ సందర్భంగా తాను దాతృత్వం, పిల్లల ఆరోగ్యం గురించి ఎంతో నేర్చుకున్నాను అంటూ బిల్ గేట్స్ పేర్కొన్నారు. ఇదే విషయాన్ని లిటిల్ మాస్టర్ సచిన్ కూడా ఎక్స్ (ఇటీవల ట్విట్టర్‌గా పిలిచే) వేదికగా షేర్ చేశారు. భారతదేశంలోని కొత్త ఆవిష్కరణలను, అభివృద్ధిని దగ్గరగా చూసేందుకు, నూతన మార్గాలను అన్వేషించేందుకు బిల్ గేట్స్ ప్రతి పర్యటనలో ఆసక్తిగా ముందుంటారు.
View this post on Instagram
