‘ఓట్‌ చోర్‌-గద్దీ ఛోడ్‌’ ర్యాలీ: సత్యం, అహింసతో మోదీని ఓడిస్తాం – రాహుల్ గాంధీ

కేంద్రంలో అధికారంలో ఉన్న నరేంద్ర మోదీ, ఆర్‌ఎస్‌ఎస్ ప్రభుత్వాన్ని సత్యం, అహింస అనే రెండు ఆయుధాల ద్వారానే పోరాడి గద్దె దించుతామని కాంగ్రెస్ అగ్రనేత, లోక్‌సభలో ప్రతిపక్ష నేత రాహుల్ గాంధీ స్పష్టం చేశారు. ఓట్ల చోరీకి పాల్పడుతున్నారని ఆరోపిస్తూ, బీజేపీపై పోరాట కార్యాచరణను ప్రకటించేందుకు న్యూఢిల్లీలోని రాంలీలా మైదానంలో కాంగ్రెస్ పార్టీ ఆధ్వర్యంలో ఆదివారం ‘ఓట్‌ చోర్‌-గద్దీ ఛోడ్‌’ మెగా ర్యాలీ జరిగింది.

రాహుల్ గాంధీ కీలక వ్యాఖ్యలు

• పోరాట మార్గం: దేశంలో సత్యానికి, అసత్యానికి మధ్య పోరాటం నడుస్తోందని రాహుల్ గాంధీ అన్నారు. మహాత్మాగాంధీ చూపిన సత్యం, అహింస మార్గంలో పోరాడడం ద్వారానే మోదీ ప్రభుత్వాన్ని అధికారం నుంచి దించుతామని ప్రతినబూనారు.

• ఈసీపై విమర్శలు: కేంద్ర ఎన్నికల సంఘం (EC) బహిరంగంగానే బీజేపీ కోసం పనిచేస్తోందని, కేంద్రం చెప్పినట్లే చేస్తోందని ఆయన ఆరోపించారు. ఈసీ కమిషనర్ల పేర్లు ప్రస్తావించి మరీ, వారు ఇకనైనా దేశం కోసం పనిచేయాలని, మోదీ కోసం కాదని సత్యాన్ని గ్రహించాలని అన్నారు.

• ఓట్‌ చోరీ ఆరోపణ: ఓట్‌ చోరీ విషయంలో తాము దొరికిపోయామని మోదీ, షాలకు అర్థమైందని రాహుల్ తెలిపారు. లోక్‌సభలో తన ప్రశ్నకు హోంమంత్రి అమిత్ షా సమాధానం ఇస్తున్నప్పుడు ఆయన చేతులు వణికాయని, అదే వారి ఆత్మవిశ్వాసం సడలిందనడానికి నిదర్శనమని మండిపడ్డారు.

• విజయం మాదే: “సత్యం గెలవడానికి సమయం పట్టొచ్చు, కానీ అంతిమ విజయం సత్యానిదే” అని రాహుల్ గాంధీ ధీమా వ్యక్తం చేశారు. కాంగ్రెస్ అధికారంలోకి వచ్చిన వెంటనే, ఈసీ కమిషనర్లపై చర్యలు తీసుకోకుండా కేంద్రం తీసుకొచ్చిన చట్టాన్ని మారుస్తామని హామీ ఇచ్చారు.

ఖర్గే, ప్రియాంక గాంధీ ఫైర్

• రాజ్యాంగంపై కుట్ర: ఏఐసీసీ చీఫ్ మల్లికార్జున ఖర్గే మాట్లాడుతూ.. బీజేపీ, ఆర్‌ఎస్‌ఎస్ లు దశలవారీగా రాజ్యాంగాన్ని నాశనం చేసే కుట్ర పన్నుతున్నారని ఆరోపించారు. హిందుత్వం పేరుతో పేదలను బానిసలుగా ఉంచాలని చూస్తున్నారని విమర్శించారు. ధనవంతులు, పేదల మధ్య పోరాటం జరుగుతోందని, దేశాన్ని కాపాడగలిగేది కాంగ్రెస్ మాత్రమేనని పిలుపునిచ్చారు.

• బ్యాలెట్‌ సవాల్: ప్రియాంక గాంధీ మాట్లాడుతూ.. దమ్ముంటే బ్యాలెట్ విధానంలో పోటీ చేసి ఎన్నికల్లో గెలవాలని బీజేపీకి సవాల్ విసిరారు. ఎన్నికలకు ముందు రూ.10 వేలు ఖాతాలో వేయడం ఓట్‌ చోరీ కాదా అని ప్రశ్నిస్తూ, ఓట్ చోరీకి వ్యతిరేకంగా దేశ ప్రజలంతా ఏకతాటిపైకి రావాలని పిలుపునిచ్చారు.

కాగా ఈ మెగా ర్యాలీలో ఏఐసీసీ మాజీ అధ్యక్షురాలు సోనియా గాంధీ, కాంగ్రెస్ పార్టీ సీనియర్ ఎంపీ కేసీ వేణుగోపాల్‌తో పాటు తెలంగాణ ముఖ్యమంత్రి రేవంత్ రెడ్డి, ఉప ముఖ్యమంత్రి భట్టి విక్రమార్క సహా పలువురు ముఖ్య నాయకులు పాల్గొన్నారు.