ప్రపంచంలోనే అతిపెద్ద ధార్మిక సమ్మేళనమైన మహా కుంభ మేళాలో ప్రయాగ్ రాజ్ దశాశ్వమేధ ఘాట్ వద్ద టీటీడీ ఘనంగా శ్రీవారి స్నపన తిరుమంజనం నిర్వహించింది. తిరుమల శ్రీవారి ఆలయ ప్రధాన అర్చకులు వేణుగోపాల దీక్షితులు నేతృత్వంలో శ్రీదేవి, భూదేవి సమేత శ్రీ శ్రీనివాసస్వామివారికి పాలు, పెరుగు, తేనె, పసుపు, కొబ్బరినీళ్లు వంటి పవిత్ర ద్రవ్యాలతో అభిషేకం నిర్వహించారు.
వేద పండితుల వల్లించిన శ్రీ సూక్తం, పురుష సూక్తం, నారాయణ సూక్తం వంటి మంత్రోచ్ఛారణల నడుమ ఈ కార్యక్రమం భక్తుల హృదయాలను తాకింది. అభిషేకం అనంతరం తులసి మాలలతో ఉత్సవ మూర్తులను అలంకరించి, శ్రీ చక్రతాళ్వార్‌ను గంగా నదిలో మంగళ వాయిద్యాల నడుమ చక్రస్నాన మహోత్సవం నిర్వహించారు.
ఉత్తర ప్రదేశ్‌లో మహా కుంభమేళాలో జరుగుతున్న టీటీడీ కార్యక్రమాలను మరింత వైభవంగా నిర్వహించాలని టీటీడీ ఈవో జె. శ్యామలరావు అధికారులను ఆదేశించారు. శ్రీవారి కల్యాణోత్సవాలు జనవరి 18, 26, ఫిబ్రవరి 3, 12 తేదీల్లో జరుగనున్నాయి. ఈవో మాట్లాడుతూ ప్రధాన తేదీల్లో భక్తుల రద్దీ అధికంగా ఉండే కారణంగా క్యూలైన్లతో పాటు అన్ని సౌకర్యాలను సమన్వయంతో అమలు చేయాలని సూచించారు. భక్తుల కోసం ఉచితంగా చిన్న లడ్డూలను అందించడంపై కూడా ప్రత్యేక దృష్టి పెట్టాలని ఆదేశించారు.
స్నపన తిరుమంజనం గంగా నదీ తీరంలో కన్నుల పండువగా నిర్వహణ. రద్దీని దృష్టిలో పెట్టుకొని ప్రత్యేక ఏర్పాట్లతో టిటిడి శ్రీవారి సేవలు. వసంత పంచమి, మౌణి అమావాస్య, మాగ పౌర్ణమి, శివరాత్రి వంటి తేదీలకు అధిక భక్తుల రాక. భక్తుల కోసం ఆధ్యాత్మిక సేవలు మరియు సౌకర్యాలను మరింత మెరుగుపరచడంలో టీటీడీ కృషి కొనసాగుతోంది!
