అమెరికా అధ్యక్షుడిగా మరోసారి కూడా డొనాల్డ్‌ ట్రంప్‌ బాధ్యతలు చేపట్టాక..తన 2.0 పాలనలో తీసుకుంటున్న నిర్ణయాలు అమెరికాలో ఉంటున్న వలసదారులను ఆందోళనకు గురి చేస్తున్నాయి. ఇప్పటికే అక్రమ వలసదారులను స్వదేశాలకు పంపిస్తుండటంతో అక్కడున్నవారంతా టెన్షన్ పడుతుంటే..తాజాగా గ్రీన్ కార్డు కూడా పర్మినెంట్‌ కాదని ఉపాధ్యక్షుడు జేడీ.వాన్స్ ప్రకటించడం హాట్ టాపిక్ అయింది.
అమెరికా ఉపాధ్యక్షుడు జేడీ వాన్స్ ఇటీవల చేసిన ఈ వ్యాఖ్యలు వలసదారుల్లో, ముఖ్యంగా భారతీయుల్లో ఆందోళన కలిగిస్తున్నాయి. గ్రీన్‌కార్డు పొందినంత మాత్రాన అమెరికాలో ఎల్లప్పుడూ ఉండే హక్కు రాదంటూ తాజాగా జేడీ వాన్స్ చేసిన వ్యాఖ్యలు లక్షలాది మంది ఆశలపై నీళ్లు చల్లినట్లు అయింది. అగ్రరాజ్యం అమెరికా ఇటీవల వలస చట్టాలను మరింత కఠినతరం చేయడం ఆందోళనను పెంచింది. దీంతో హెచ్‌–1బీ, ఎఫ్‌–1 వీసాలు, గ్రీన్‌కార్డు ఉన్న భారతీయులు ఇకపై ప్రయాణాల్లో అప్రమత్తంగా ఉండాలని యూఎస్ ఇమిగ్రేషన్‌ అధికారులు కీలక అడ్వైజరీ జారీ చేశారు. అమెరికాకు వెళ్లేముందు, అమెరికా నుంచి తమ దేశాలకు వెళ్లే సమయంలో తనిఖీలు ఎక్కువగా ఉంటాయని, సహనంతో ఉండాలని సూచించారు
ట్రంప్‌ ప్రభుత్వం 43 దేశాల పౌరులపై అమెరికా ప్రవేశ నిషేధం విధించే దిశగా ప్రణాళికలు రూపొందిస్తోంది. అయితే భారత్‌ ఈ జాబితాలో లేకపోయినా కూడా అమెరికా వెలుపల ప్రయాణాలు చేసే భారతీయులంతా జాగ్రత్తగా ఉండాలని అధికారులు హెచ్చరిస్తున్నారు. గ్రీన్‌కార్డు, హెచ్‌–1బీ, ఎఫ్‌–1 వీసా హోల్డర్లు భారత దేశంలోకి వచ్చే ముందు తిరిగి అమెరికా వెళ్లే సమయంలో కఠిన తనిఖీల వల్ల వీసా స్టాంపింగ్‌ ఆలస్యం కావొచ్చని అధికారులు చెబుతున్నారు. వలస నిబంధనలు కఠినంగా మారడంతో..వ్యక్తుల వివరాలను లోతుగా పరిశీలించడానికి ఎక్కువ సమయం పడుతోందని వివరించారు. అలాగే తమ దేశంలో ఎక్కువ కాలం గడిపి తిరిగి అమెరికాకు వచ్చేవాళ్లు కస్టమ్స్, బోర్డర్‌ అధికారులు అడిగే కఠినమైన ప్రశ్నలకు సమాధానాలు ఇవ్వాల్సి ఉంటుందని హెచ్చరించారు.
వలసదారులు తమ స్వదేశ పాస్‌పోర్ట్‌తో పాటు అన్ని పత్రాలను కూడా ఎల్లప్పుడూ వెంటే ఉంచుకోవాలని అధికారులు సూచించారు. గ్రీన్‌కార్డు, వీసా, రీఎంట్రీ పర్మిట్, ఉపాధి ధ్రువీకరణ లేఖ, ఫెడరల్‌ ఆదాయపు పన్ను చెల్లింపులు, పే స్లిప్పులు వంటివి తమ వెంట సిద్ధంగా ఉంచుకోవాలని చెబుతున్నారు. విద్యార్థులు అయితే ..వారి యూనివర్సిటీ లేదా కాలేజీ నుంచి అనుమతి పత్రం, యూఎస్ బ్యాంకు అకౌంట్ వివరాలు చూపించాలని సూచించారు. జేడీ వాన్స్ తాజాగా హాట్ కామెంట్స్ చేయడంతో.. వలసదారులు మరింత అప్రమత్తంగా ఉండాలని, అవసరమైన డాక్యుమెంట్లను సిద్ధంగా ఉంచుకోవాలని నిపుణులు అభిప్రాయపడుతున్నారు.
