ఆర్థిక అత్యవసరాలను తీర్చడానికి గోల్డ్ లోన్ ఉత్తమ మార్గంగా నిలుస్తోంది. బ్యాంకులు, ఆర్థిక సంస్థలు బంగారం విలువ ఆధారంగా దాని 75 శాతం వరకు రుణం మంజూరు చేస్తాయి. అయితే, ప్రస్తుతం ఉన్న బుల్లెట్‌ రీపేమెంట్‌ విధానం చాలా మంది కస్టమర్లకు ఇబ్బందిగా మారింది. ఈ విధానంలో రుణ కాలపరిమితి పూర్తయిన తర్వాత మొత్తం రుణాన్ని వడ్డీతో కలిపి ఒకేసారి చెల్లించాలి.
ఈ పరిస్థితిని మార్చేందుకు రిజర్వ్ బ్యాంక్ ఆఫ్ ఇండియా (ఆర్‌బీఐ) బంగారు రుణాలకు ఈఎంఐ పద్ధతిని ప్రవేశపెట్టే దిశగా చర్యలు చేపడుతోంది. ఈ కొత్త పద్ధతిలో రుణ గ్రహీతలు ప్రతినెలా వాయిదా చెల్లించే సదుపాయం పొందుతారు, తద్వారా ఒకేసారి భారీ మొత్తాన్ని చెల్లించే భారం తగ్గుతుంది.
బంగారు రుణాల మంజూరులో అవకతవకలను ఆర్‌బీఐ గుర్తించింది. బంగారం విలువను తేల్చడంలో లోపాలు, వేలం ప్రక్రియలో పారదర్శకత కొరవడడం వంటి అంశాలపై దృష్టి సారించింది. అలాగే కొందరు వడ్డీ మాత్రమే చెల్లిస్తూ రుణాన్ని దీర్ఘకాలం కొనసాగిస్తున్నట్లు తేలింది.
ఈఎంఐ పద్ధతి ప్రవేశపెట్టడం ద్వారా కస్టమర్లపై వడ్డీ భారం తగ్గడమే కాకుండా రుణ పరిపాలనను పారదర్శకంగా నిర్వహించవచ్చని ఆర్‌బీఐ భావిస్తోంది. ఇది ముఖ్యంగా ఉద్యోగస్తులకు ప్రయోజనకరంగా ఉంటుందని నిపుణులు అభిప్రాయపడుతున్నారు.
ప్రస్తుతం పసిడిపై రుణాలకు అధిక డిమాండ్ ఉండటంతో బ్యాంకులు, ఆర్థిక సంస్థలు ఈ ఆర్థిక సంవత్సరంలో సుమారు ₹1.4 లక్షల కోట్ల విలువైన బంగారు రుణాలను మంజూరు చేశాయి. తక్కువ వడ్డీ రేటు, తక్షణ రుణ లభ్యత కారణంగా బంగారు రుణాల ప్రాముఖ్యత పెరుగుతోంది.
ఈ కొత్త విధానం అమలవడంతో కస్టమర్లకు సులభతరం కావడంతో పాటు, రుణ మంజూరులో పారదర్శకత కూడా పెరుగుతుందని ఆశిస్తున్నారు.
