58 ఏళ్ల దిగ్గజ బాక్సర్ మైక్ టైసన్‌ను 27 ఏళ్ల యూట్యూబర్-బాక్సర్ జేక్ పాల్ ఓడించి సంచలనం సృష్టించాడు. అమెరికా టెక్సాస్ రాష్ట్రం ఆర్లింగ్టన్‌లోని ఏటీఅండ్‌టీ స్టేడియంలో ఈ ప్రతిష్టాత్మక పోరు జరిగింది. నెట్‌ఫ్లిక్స్ ఈ మ్యాచ్‌ను ప్రత్యక్ష ప్రసారం చేయగా, భారతదేశం సహా ప్రపంచవ్యాప్తంగా కోట్ల మంది వీక్షించారు. ప్రదర్శన సమయంలో అమెరికా, భారత్‌లో నెట్‌ఫ్లిక్స్ తాత్కాలికంగా డౌన్ అయ్యిందన్న వార్తలు చర్చనీయాంశమయ్యాయి. మొత్తం 8 రౌండ్ల పోరులో, టైసన్, పాల్ హోరాహోరీగా తలపడ్డారు. తొలి రెండు రౌండ్లలో టైసన్ ఆధిక్యం సాధించాడు. అయితే చివరి ఆరు రౌండ్లలో జేక్ పాల్ తన అద్భుతమైన ప్రదర్శనతో పూర్తి ఆధిపత్యం చూపించాడు.
పాయింట్ల వివరాలు:
పాల్ మొత్తం 78 పాయింట్లు సాధించగా, టైసన్ కేవలం 74 పాయింట్లకు పరిమితమయ్యాడు.
చివరి ఆరు రౌండ్లలో ప్రతీ రౌండ్‌లోనూ పాల్ 10 పాయింట్లను కైవసం చేసుకోవడం విశేషం.
మ్యాచ్‌కు ముందు జరిగిన ఉద్రిక్తత:
మ్యాచ్‌కు ముందు టైసన్, పాల్ మధ్య తీవ్ర ఉద్రిక్తత నెలకొంది. టైసన్ జేక్ పాల్‌ను చెంపదెబ్బ కొట్టగా, భద్రతా సిబ్బంది ఇద్దరినీ వెంటనే అదుపులోకి తీసుకున్నారు. ఈ సంఘటన మ్యాచ్‌పై మరింత ఉత్కంఠను పెంచింది. కానీ చివరకు, రింగ్‌లో తన ప్రతీకారం తీర్చుకున్న జేక్ పాల్ టైసన్‌పై ఘన విజయాన్ని అందుకున్నాడు.
మ్యాచ్ అనంతరం స్నేహపూర్వక భవనం:
పోరు ముగిసిన తర్వాత, టైసన్, పాల్ ప్రఫెషనల్‌గా ఒకరికొకరు అభివాదం చేసుకున్నారు. టైసన్, 2005లో కెవిన్‌ చేతిలో ఓటమి తర్వాత ప్రొఫెషనల్ బాక్సింగ్‌కు గుడ్‌బై చెప్పిన ఆయన, ఇప్పటివరకు రింగ్‌కు దూరంగా ఉన్నాడు. అయితే, ఇప్పుడున్న జనరేషన్ బాక్సర్ అయిన జేక్ పాల్‌తో తలపడటం ఆయన కెరీర్‌లో మరో ప్రత్యేక ఘట్టం.
ఈ మ్యాచ్ ద్వారా, టైసన్ దాదాపు ₹168 కోట్లు, జేక్ పాల్ దాదాపు ₹337 కోట్లు సంపాదించినట్లు సమాచారం. ఈ విజయంతో జేక్ పాల్ తన బాక్సింగ్ కెరీర్‌లో మరో అద్భుతమైన ఫలితాన్ని నమోదు చేయగా, టైసన్ మరోసారి తన స్ఫూర్తిని చాటుకున్నాడు.
