హైదరాబాద్‌లో చోటుచేసుకున్న మహిళా భద్రతకు సంబంధించిన ఘటనా వివాదాస్పదంగా మారింది. ఎంఎంటీఎస్ రైలులో ఒక యువతిపై అత్యాచారయత్నం జరిగిన ఘటనపై పోలీసులు ముమ్మరంగా విచారణ చేస్తున్నారు. నిందితుడిని పట్టుకోవడానికి ప్రత్యేక బృందాలను ఏర్పాటు చేశారు. సీసీ కెమెరా ఫుటేజీలను విశ్లేషించి, అనుమానితుడిని గుర్తించిన పోలీసులు అతన్ని అదుపులోకి తీసుకున్నారు. నిందితుడిగా మేడ్చల్ జిల్లా గౌడవల్లి గ్రామానికి చెందిన జంగం మహేష్‌ను గుర్తించారు. బాధితురాలికి నిందితుడి ఫొటోను చూపించగా, అతనే దాడికి పాల్పడ్డాడని ఆమె ధృవీకరించిందని సమాచారం. మహేష్ గతంలోనూ నేరాలకు పాల్పడిన వ్యక్తిగా పోలీసులు చెబుతున్నారు.
నిందితుడి కోసం నాలుగు బృందాలు ఏర్పాటుచేసి, సికింద్రాబాద్ నుంచి మేడ్చల్ వరకు ప్రాంతాన్ని అన్వేషించారు. రైల్వే స్టేషన్లలోని సీసీ కెమెరాలను పరిశీలించి, అతని కదలికలను ట్రాక్ చేశారు. ఈ ఆధారాలతో మహేష్‌ను గుర్తించి అరెస్టు చేశారు.
ఇదే సమయంలో, బాధితురాలు ప్రస్తుతం ఆస్పత్రిలో చికిత్స పొందుతోంది. ఆమెకు తీవ్ర గాయాలు కాగా, ఇంటర్నల్ ఇన్ఫెక్షన్ వచ్చే ప్రమాదం ఉందని వైద్యులు వెల్లడించారు. మూడ్రోజుల పాటు ఆమెను అబ్జర్వేషన్‌లో ఉంచనున్నారు. ఫేస్ బోన్స్‌కు తీవ్రమైన గాయాలు తగలడంతో, మూడ్రోజుల తర్వాత శస్త్రచికిత్స చేయనున్నారు.
ఈ ఘటనకు సంబంధించి వివరాలు ఇలా ఉన్నాయి: అనంతపురం జిల్లా యువతి, హైదరాబాద్‌లో ఓ ప్రైవేట్ సంస్థలో ఉద్యోగం చేస్తోంది. మేడ్చల్‌లో నివసించే ఆమె సెల్‌ఫోన్‌ రిపేర్ చేయించేందుకు మార్చి 22న సాయంత్రం సికింద్రాబాద్‌కు వెళ్లింది. రాత్రి 7.15 గంటలకు తెల్లాపూర్-మేడ్చల్ ఎంఎంటీఎస్ రైలులోని మహిళల బోగీలో ఎక్కింది. 8.15 గంటలకు అల్వాల్ స్టేషన్ చేరుకున్నప్పుడు ఇతర మహిళలు దిగిపోవడంతో ఆమె ఒంటరిగా బోగీలో మిగిలిపోయింది. ఈ సమయంలో నిందితుడు ఆమెను వేధించేందుకు ప్రయత్నించి, అత్యాచారయత్నానికి పాల్పడ్డాడు. భయపడిన ఆమె రైలు నుంచి దూకి తీవ్రంగా గాయపడింది. స్థానికులు గమనించి 108 అంబులెన్స్ ద్వారా గాంధీ ఆసుపత్రికి తరలించారు.
