తెలంగాణ అసెంబ్లీలో భూ భారతి చట్టంపై తీవ్ర రాజకీయ వాదోపవాదాలు చోటు చేసుకున్నాయి. భూ హక్కులు, కొత్త విధానాల అమలుపై కాంగ్రెస్, బీఆర్‌ఎస్ నాయకులు పరస్పరం ఆరోపణలు చేసుకున్నారు. ముఖ్యంగా భూ భారతి చట్టంపై బీఆర్‌ఎస్ తీవ్రంగా విమర్శలు గుప్పించగా, కాంగ్రెస్ ప్రభుత్వం ధరణిని రద్దు చేసి ప్రజలకు న్యాయం చేస్తోందని దృఢంగా తెలిపింది.
బీఆర్‌ఎస్ ఎమ్మెల్యే పల్లా రాజేశ్వర్‌రెడ్డి మాట్లాడుతూ, భూ భారతి అనే కొత్త విధానం రైతులకు మేలు చేసే విధంగా లేదని, ఇది భూ హారతి లాంటిదని వ్యాఖ్యానించారు. కాంగ్రెస్ ప్రభుత్వం జమాబందీ పేరుతో రైతులను మోసగిస్తున్నదని ఆరోపించారు. ప్రభుత్వానికి భూముల సరైన నిర్వహణపై స్పష్టమైన ప్రణాళిక లేదని విమర్శించారు.
ఈ వ్యాఖ్యలపై డిప్యూటీ సీఎం భట్టి విక్రమార్క, మంత్రి పొంగులేటి శ్రీనివాస్‌రెడ్డి తీవ్ర అభ్యంతరం వ్యక్తం చేశారు. భట్టి విక్రమార్క మాట్లాడుతూ, గతంలో బీఆర్‌ఎస్ ప్రభుత్వం అమలు చేసిన ధరణి విధానం రైతుల హక్కులను కాలరాస్తూ, భూములను కొందరు లబ్ధిదారులకు మాత్రమే కట్టబెట్టిందని ఆరోపించారు. అందుకే ప్రజలు కొత్త ప్రభుత్వానికి పట్టం కట్టారని స్పష్టం చేశారు.
భట్టి విక్రమార్క తన ప్రసంగంలో, “ధరణిని బంగాళాఖాతంలో విసరాలని ప్రజలు కోరారు. మేమూ అదే చేశాం. భూ భారతి చట్టం ద్వారా రైతులకు భూస్వామ్య హక్కులను తిరిగి అందిస్తున్నాం” అని తెలిపారు. పల్లా రాజేశ్వర్‌రెడ్డి అసత్య ప్రచారం చేస్తున్నారని ఆయన విమర్శించారు.
మంత్రి పొంగులేటి శ్రీనివాస్‌రెడ్డి మాట్లాడుతూ, భూ హక్కుల పరిరక్షణ కోసం భూ భారతి చట్టాన్ని తీసుకువచ్చామని, అర్హులైన ప్రతి ఒక్కరికీ న్యాయం చేస్తామని హామీ ఇచ్చారు. “గత ప్రభుత్వం వీఆర్‌ఏ, వీఆర్వోలను పట్టించుకోలేదు. కానీ, మేము వారికి గౌరవప్రదమైన స్థానం కల్పిస్తాం” అని పొంగులేటి అన్నారు.
భూ హక్కుల అంశం తెలంగాణ రాజకీయాల్లో కీలకంగా మారింది. భూ భారతిపై వచ్చిన విమర్శలను ఎదుర్కొంటూ కాంగ్రెస్ ప్రభుత్వం ప్రజలకు పూర్తి స్పష్టత ఇచ్చే ప్రయత్నంలో ఉంది.
