తెలంగాణలో గ్రామాల పరిపాలన వ్యవస్థను మరింత సమర్థవంతం చేయాలనే లక్ష్యంతో రేవంత్ రెడ్డి ప్రభుత్వం కీలక నిర్ణయాలు తీసుకుంది. ఈ క్రమంలో, రెవెన్యూ శాఖలో కొత్తగా 10,954 గ్రామ పాలన అధికారుల (జీపీఓ) నియామకానికి మార్గదర్శకాలు ఖరారు చేసింది. వీటిలో, గతంలో గ్రామ రెవెన్యూ అధికారులు (వీఆర్‌ఓ) లేదా గ్రామ అసిస్టెంట్లు (వీఆర్‌ఏ)గా పనిచేసిన వారికి మొదటి ప్రాధాన్యత ఇవ్వనున్నారు. ఇందుకు సంబంధించి ఆర్థిక శాఖ అధికారిక ఉత్తర్వులు జారీ చేసింది.
జీపీఓ నియామక విధానం
జీపీఓ పోస్టులకు ఇంటర్మీడియట్ విద్యార్హతతో పాటు, కనీసం ఐదేళ్లు వీఆర్‌ఓ లేదా వీఆర్‌ఏగా పనిచేసిన అనుభవం ఉన్నవారు అర్హులు. ఆసక్తిగల అభ్యర్థులు దరఖాస్తు చేసుకునేందుకు వీలు కల్పించారు. వీరి ఎంపికకు ప్రత్యేక స్క్రీనింగ్ పరీక్ష నిర్వహించనున్నారు. పరీక్షలో వచ్చిన మార్కుల ఆధారంగా అభ్యర్థులను ఎంపిక చేసి, నియామక పత్రాలు అందజేస్తారు. ఎంపికైన అధికారులు గ్రామ స్థాయిలో అకౌంటింగ్, సర్టిఫికేట్ ఎంక్వైరీ, భూఅభ్యర్థన వంటి బాధ్యతలు నిర్వర్తించనున్నారు.
అంగన్‌వాడీ ఉద్యోగాల భర్తీ
రాష్ట్రంలో నిరుద్యోగులకు ఉపాధి అవకాశాలను పెంచే దిశగా ప్రభుత్వం మరో కీలక నిర్ణయం తీసుకుంది. ఉప ముఖ్యమంత్రి భట్టి విక్రమార్క ప్రకారం, 14,236 అంగన్‌వాడీ ఉద్యోగాలను భర్తీ చేసేందుకు చర్యలు వేగవంతం చేశారు. త్వరలోనే వీటి కోసం అధికారిక నోటిఫికేషన్ విడుదల చేయనున్నారు. అంతేకాకుండా, నిరుద్యోగుల కోసం నాలెడ్జ్ సెంటర్లలో గ్రూప్-1, గ్రూప్-2 ఉచిత శిక్షణ అందించనున్నట్లు తెలిపారు.
ఏపీపీజీఈసెట్ 2025 నోటిఫికేషన్ విడుదల
ఆంధ్రప్రదేశ్ స్టేట్ కౌన్సిల్ ఆఫ్ హయ్యర్ ఎడ్యుకేషన్ (APSCHE) ఎంటెక్, ఎం ఫార్మసీ, డి ఫార్మ (పీబీ) కోర్సుల్లో ప్రవేశాల కోసం ఏపీపీజీఈసెట్-2025 నోటిఫికేషన్ విడుదల చేసింది. ఈ ప్రవేశ పరీక్షను ఆంధ్ర విశ్వవిద్యాలయం నిర్వహించనుంది. దరఖాస్తు ప్రక్రియ ఏప్రిల్ 1 నుంచి 30 వరకు కొనసాగుతుంది. ఫీజుగా ఓసీ అభ్యర్థులకు రూ.1200, బీసీ అభ్యర్థులకు రూ.900, ఎస్సీ, ఎస్టీ, పీహెచ్ అభ్యర్థులకు రూ.700గా నిర్ణయించారు. జూన్ 6, 8 తేదీల్లో పరీక్షలు నిర్వహించనున్నారు.
