మెగా చీఫ్‌ కంటెండర్‌షిప్‌ కోసం బిగం బాస్ హౌస్‌లో పోటీలు జరిగాయి. యష్మి, విష్ణుప్రియ, ప్రేరణ.. ముగ్గురూ టఫ్‌ టాస్కులోనూ కష్టపడి ఆడారు. ఇప్పటికే రోహిణి, నబీల్‌ కంటెండర్‌షిప్‌ బ్యాడ్జులు గెలిచారు. మిగిలిన పృథ్వీ కోసం ‘కీని పట్టు.. కంటెండర్‌షిప్‌ను గెలిచేట్టు’ అనే గేమ్‌ను బిగ్ బాస్ ఇచ్చాడు. ముందుగా కీస్ సంపాదించి అన్ని బాక్సులు ఓపెన్‌ చేసినవారు గెలుస్తారు. పృథ్వీతో ఎవరు ఆడాలనుకుంటున్నారో చెప్పాలనగా దాదాపు హౌస్‌మేట్స్‌ అందరూ ముందుకు రాగా దీంతో పృథ్వీ.. అందరిలో నుంచి విష్ణుప్రియను సెలక్ట్‌ చేసుకున్నాడు.
ఈ గేమ్‌లో పృథ్వీ అతి తెలివితో విష్ణుప్రియను బురిడీ కొట్టించి గెలిచి.. కంటెండర్‌షిప్‌ బ్యాడ్జ్‌ ధరించాడు. అతని సూట్‌కేస్‌లో 99వేలు రూపాయలు ఉండగా..అవి ప్రైజ్‌మనీలో యాడ్‌ అయ్యాయి. పృథ్వీకి ఒకర్ని చీఫ్‌ కంటెండర్‌ చేసే ఛాన్స్‌ ఉండగా ఆ అవకాశాన్ని అతడు విష్ణుప్రియకు ఇచ్చాడు.
ఇకపోతే బ్యాడ్జులు గెలిచిన నబీల్‌, పృథ్వీ, రోహిణి.. యష్మి, విష్ణుప్రియ, ప్రేరణలను కంటెండర్లుగా సెలక్ట్‌ చేశారు. ఈ ముగ్గురికీ బిగ్‌బాస్‌ ఇసుక బస్తాలతో గేమ్‌ పెట్టగా..దీనిలో ప్రేరణ విజయం సాధించి కంటెండర్‌షిప్‌ బ్యాడ్జ్‌ ధరించింది.
పృథ్వీకి విష్ణు చెల్లిలా అన్నీ దగ్గరుండి చేసి పెడుతుందని గంగవ్వ మెచ్చుకుంది. అక్కడ చెల్లి అనే పదం విని గుండె ముక్కలైన విష్ణు.. చెల్లి కాదు, అతడంటే ప్రేమ అని విష్ణు చెప్తున్నా కూడా అవన్నీ కుదరవని తీర్పు చెప్పింది. తర్వాత బిగ్‌బాస్‌.. తేజను కన్ఫెషన్‌ రూమ్‌కు పిలిచి అతడి ముందు కేక్‌ పెట్టి.. కేక్‌ కావాలంటే ఇంటిసభ్యుల గురించి ఒక మంచి గాసిప్‌ చెప్పాలన్నాడు.
దీంతో తేజ.. గౌతమ్‌.. యష్మి ..నిఖిల్‌ మధ్య ట్రయాంగిల్‌ లవ్‌స్టోరీ నడిచిందని కానీ ఇప్పుడు అది లేదన్నాడు. గౌతమ్‌- యష్మీ మధ్య అక్కాతమ్ముళ్ల అనుబంధం, నిఖిల్‌- యష్మి మధ్య ఫ్రెండ్‌షిప్‌ ఉందంటాడు. తర్వాత నీకు ఎవరు క్రష్‌ అని బిగ్‌బాస్‌ అడగడంతో పడీపడీ నవ్విన తేజ.. క్రష్‌ కాదుగానీ ప్రేరణతో మంచి అనుబంధం ఏర్పడిందని చెప్పాడడు. కన్ఫెషన్‌ రూమ్‌ నుంచి బయటకు వచ్చిన తేజ అసలు విషయం చెప్పకుండా.. యష్మీ సూట్‌కేస్‌ ఎవరికైనా ఒకరికి ఇవ్వాలని బిగ్‌బాస్‌ చెప్పాడని అబద్ధమాడతాడు.
తేజ చెప్పింది నిజమని నమ్మిన యష్మి.. వెంటనే తన సూట్‌కేసును గౌతమ్‌కు ఇచ్చింది. పోయినవారం అతడిని రేస్‌ నుంచి తీసేసినందుకు ఈసారి ఒక ఛాన్స్‌ ఇవ్వాలనుకుంది. కానీ పృథ్వీ అందుకు ఒప్పుకోకుండా.. అతడికెందుకు ఇస్తావంటూ కోపంగా మాట్లాడాడు. దీంతో యష్మి ఫీలవగా.. అది చూసిన విష్ణు.. ఈ అబ్బాయిలు డిక్టేటర్‌గా మనల్ని రూల్‌ చేయడమేంటని అసహనం వ్యక్తం చేసింది.
అటు ప్రేరణను కన్ఫెషన్‌ రూమ్‌లోకి పిలిచిన బిగ్‌బాస్‌ ఏదైనా గాసిప్‌ చెప్తే కేక్‌ తినొచ్చంటాడు. నిఖిల్‌కు యష్మి అంటే ఇష్టం.. కానీ, అందరి ముందు బయటపడటం లేదని అంటుంది. అయితే ఎంతోకాలంగా మెగా చీఫ్‌ పోస్ట్‌ కోసం కళ్లలో వత్తులు వేసుకుని ఎదురుచూస్తున్న ప్రేరణ.. ఎట్టకేలకు చీఫ్‌ పదవిని కైవసం చేసుకున్నట్లు తెలుస్తుంది.
