జాతిపిత మహాత్మా గాంధీ మద్యపానానికి, జంతు హింసకు వ్యతిరేకంగా జీవించి, ప్రజలకు మద్యపాన నిషేధం అవసరాన్ని వదిలిన సందేశం ఇచ్చారు. గాంధీ జయంతి, వర్థంతి రోజుల్లో మద్యం, మాంసం దుకాణాలు మూసివేయడం భారతీయ సంప్రదాయం. కానీ, ఇటీవల ఒక వీడియో సామాజిక మాధ్యమాల్లో వైరల్‌గా మారింది, ఇందులో గాంధీ చిత్రాలు, సంతకం ఉన్న రష్యన్ బీర్ టిన్స్ కనిపించాయి.
రష్యన్ బ్రాండ్ “Rewort Hazy IPA” అనే బీర్ టిన్లపై గాంధీ బొమ్మ, ఆయన పేరు, సంతకం ముద్రించడంతో భారతీయులు ఆగ్రహం వ్యక్తం చేస్తున్నారు. ఈ చిత్రాలు సామాజిక మాధ్యమాల్లో వైరల్‌ అవ్వడంతో, నెటిజన్లు ఈ చర్యను దేశాన్ని కించపరిచే చర్యగా పేర్కొంటున్నారు. వెంటనే బీర్లపై గాంధీ చిత్రాలను తొలగించాలని, బ్రాండ్‌పై చర్యలు తీసుకోవాలని డిమాండ్ చేస్తున్నారు.
సామాజిక కార్యకర్త శ్రీ సుపర్ణో సప్తతీ, ప్రధాని మోదీకి X (Twitter) ద్వారా విజ్ఞప్తి చేస్తూ, ఈ చిత్రాలను సోషల్ మీడియాలో తొలగించాలని కోరారు. గాంధీ మద్యపానాన్ని వ్యతిరేకించిన వ్యక్తి కాగా, ఆయన చిత్రాన్ని బీర్ బాటిళ్లపై ముద్రించడం అవమానకరమని విమర్శించారు.
ఇది తొలిసారి కాదు. గతంలో 2018 ఫిఫా వరల్డ్‌కప్ సందర్భంగా, రష్యాలోని నిజ్నీ నొవ్‌గోరోడ్ బార్‌లో గాంధీ ఫొటోతో బీర్లు విక్రయమయ్యాయి. అంతేకాదు, ఈ బ్రేవరీ మదర్ థెరిసా, నెల్సన్ మండేలా, మార్టిన్ లూథర్ కింగ్ జూనియర్ వంటి ప్రముఖ నాయకుల పేర్లతో కూడిన బీర్ టిన్లను కూడా తయారు చేసింది.
2014లో యూఎస్‌ కంపెనీ కూడా గాంధీ బీర్ పేరిట ఒక బ్రాండ్‌ను విడుదల చేయగా, హైదరాబాద్ కోర్టులో పిటిషన్ నమోదయ్యింది. అనంతరం కంపెనీ క్షమాపణలు చెప్పి ఉత్పత్తిని నిలిపివేసింది. నెటిజన్లు, భారతీయులు ఈ ఘటనపై తీవ్ర అభ్యంతరం వ్యక్తం చేస్తూ, భారత ప్రభుత్వం, ప్రధానమంత్రి నరేంద్ర మోదీ ఈ వ్యవహారంపై స్పందించి తగిన చర్యలు తీసుకోవాలని డిమాండ్ చేస్తున్నారు. భారతదేశ సంస్కృతి, గాంధీ మహాత్మ్యాన్ని అవమానించేదిగా ఉన్న ఈ బ్రాండ్ ఉత్పత్తులపై నిషేధం విధించాలని కోరుతున్నారు. ఈ వివాదంపై భారత ప్రభుత్వం ఎలా స్పందిస్తుందో చూడాలి.
My humble request with PM @narendramodi Ji is to take up this matter with his friend @KremlinRussia_E . It has been found that Russia’s Rewort is selling Beer in the name of GandhiJi… SS pic.twitter.com/lT3gcB9tMf
— Shri. Suparno Satpathy (@SuparnoSatpathy) February 13, 2025
