ఆన్‌లైన్ బెట్టింగ్ యాప్స్ ప్రమోషన్ వివాదం మరింత ముదురుతోంది. ఈ తరహా యాప్స్‌కి ప్రచారం చేసిన యూట్యూబర్లు, సోషల్ మీడియా ఇన్‌ఫ్లూయెన్సర్లు, సినీతారలకు పోలీసులు నోటీసులు జారీ చేయడంతో సెలబ్రిటీలలో ఉత్కంఠ నెలకొంది. ఈ కేసులో విచారణకు పిలువబడిన వారిలో ప్రముఖ యాంకర్ విష్ణుప్రియ, రీతూ చౌదరి కూడా ఉన్నారు. పోలీసులు వారిని ప్రశ్నించడమే కాకుండా, విష్ణుప్రియ ఫోన్‌ను సీజ్ చేసినట్లు సమాచారం. ఇక ఈడీ రంగ ప్రవేశంతో అరెస్ట్‌లు జరుగుతాయా? అనే ఊహాగానాలు మరింత వేడెక్కాయి.
ఇక తాజాగా బెట్టింగ్ యాప్స్‌కి ప్రచారం చేసిన యూట్యూబర్లు, సోషల్ మీడియా ప్రభావశీలులు వరుసగా క్షమాపణలు కోరుతూ వీడియోలు రిలీజ్ చేస్తున్నారు. అయితే ఈ వివాదంలో ప్రముఖ హీరోలు విజయ్ దేవరకొండ, రానా, ప్రకాశ్ రాజ్, నిధి అగర్వాల్ వంటి స్టార్స్ పేర్లు కూడా తెరపైకి వచ్చాయి. ముఖ్యంగా విజయ్ దేవరకొండపై మియాపూర్ పోలీస్ స్టేషన్‌లో కేసు నమోదవడంతో ఆయన అభిమానుల్లో ఆందోళన మొదలైంది.
విజయ్ దేవరకొండ టీమ్ క్లారిటీ
ఈ వివాదంపై విజయ్ దేవరకొండ టీమ్ స్పందించింది. ఆయన బెట్టింగ్ యాప్స్‌కి ప్రచారం చేయలేదని, కేవలం స్కిల్-బేస్డ్ గేమ్స్కి మాత్రమే ప్రచారకర్తగా వ్యవహరించారని స్పష్టం చేశారు. ఆయన ప్రమోట్ చేసిన అన్ని కంపెనీలు భారత చట్ట ప్రకారం నడుస్తున్నవేనని తెలిపారు. విజయ్ ఏ సంస్థకు ప్రచారం చేసినా, ముందుగా ఆ సంస్థ చట్టబద్ధంగా నడుస్తుందా అనే విషయాన్ని ఆయన టీమ్ పరిశీలిస్తుందని స్పష్టం చేశారు.
ఏ23 బ్రాండ్ అంబాసిడర్‌గా విజయ్ దేవరకొండ
విజయ్ దేవరకొండ గతంలో ఏ23 అనే ఆన్‌లైన్ రమ్మీ స్కిల్ గేమ్ ప్లాట్‌ఫామ్‌కు బ్రాండ్ అంబాసిడర్‌గా వ్యవహరించారు. ఈ రమ్మీ గేమ్‌ను గౌరవనీయ సుప్రీంకోర్టు కూడా స్కిల్-బేస్డ్ గేమ్గా గుర్తించిన విషయాన్ని విజయ్ టీమ్ గుర్తు చేసింది. అయితే, విజయ్ దేవరకొండ ఒప్పందం గతేడాది ముగిసిందని, ప్రస్తుతం ఆ సంస్థతో ఆయనకు ఎలాంటి సంబంధం లేదని స్పష్టం చేశారు.
బెట్టింగ్ యాప్స్ ప్రమోషన్ వివాదంలో ఇతర స్టార్లు
ఏ23 యాప్‌కు గతంలో బాలీవుడ్ సూపర్ స్టార్ షారుఖ్ ఖాన్, క్రికెటర్ స్మృతి మందాన, రకుల్ ప్రీత్ సింగ్ వంటి ప్రముఖులు కూడా ప్రచారం చేశారు. ఈ కేసు మరింత ఏమేరకు వెళ్లబోతుందనేది పరిశీలనీయ అంశమవుతోంది. పోలీసుల విచారణ వేగంగా కొనసాగుతుండటంతో మరిన్ని పేర్లు వెలుగులోకి వచ్చే అవకాశముంది.
