మెగాస్టార్ చిరంజీవి ఫోటోలను అశ్లీల వీడియోలుగా మార్ఫింగ్ చేసి సోషల్ మీడియాలో పోస్ట్ చేసిన డీప్‌ఫేక్ కేసులో విచారణ జరుగుతున్నట్లు నగర పోలీస్ కమిషనర్ (సీపీ) వి.సి. సజ్జనార్ తెలిపారు. ఈ కేసు విషయంలో ఆయన మీడియాతో మాట్లాడుతూ, డీప్‌ఫేక్ మూలాల్లోకి వెళ్లి నిందితులను గుర్తించి, కఠిన చర్యలు తీసుకుంటామని స్పష్టం చేశారు.
ప్రత్యేక బృందం ఏర్పాటు:
సీపీ సజ్జనార్ మాట్లాడుతూ, భవిష్యత్తులో ఇలాంటి డీప్‌ఫేక్ కేసులు సెలబ్రిటీల విషయంలో మరింతగా పెరిగే అవకాశం ఉందని హెచ్చరించారు. ఈ తరహా సైబర్ నేరాలను ఎదుర్కోవడానికి మరియు డీప్‌ఫేక్ కేసులను వేగవంతం చేయడానికి త్వరలోనే ప్రత్యేక టీమ్‌ను ఏర్పాటు చేసి విచారణ జరుపుతామని ఆయన వెల్లడించారు.
కొన్నిరోజుల క్రితం కొందరు గుర్తుతెలియని వ్యక్తులు చిరంజీవి ఫోటోలను అశ్లీలంగా మార్ఫింగ్ చేసి వెబ్‌సైట్లు, సోషల్ మీడియాలో పోస్ట్ చేయడంతో అవి వైరల్ అయ్యాయి. దీంతో స్పందించిన చిరంజీవి వెంటనే సీపీ సజ్జనార్‌కు ఫిర్యాదు చేశారు.
తన పేరును, ప్రతిష్టను దెబ్బతీసేలా ఇలాంటి వీడియోలు రూపొందిస్తున్న వారిపై కఠిన చర్యలు తీసుకోవాలని ఈ సందర్భంగా చిరంజీవి కోరారు. అనంతరం ఆయన కోర్టును సైతం ఆశ్రయించిన నేపథ్యంలో న్యాయస్థానం ఆదేశాలతో సైబర్‌క్రైమ్‌ పోలీసులు కేసు నమోదు చేసి దర్యాప్తు చేపట్టారు.
