జూబ్లీహిల్స్ అసెంబ్లీ నియోజకవర్గానికి జరుగుతున్న ఉప ఎన్నికల పోలింగ్లో అభ్యర్థులు, సినీ పరిశ్రమకు చెందిన ప్రముఖులు ఉదయం నుంచే ఉత్సాహంగా తమ ఓటు హక్కును వినియోగించుకున్నారు. మొత్తం నాలుగు లక్షల మందికి పైగా ఓటర్లు ఓటు హక్కు వినియోగించుకోనున్నారు.
ఉప ఎన్నికల నేపథ్యంలో అధికారులు 407 పోలింగ్ స్టేషన్లను ఏర్పాటు చేశారు. 2,400 మంది పోలీసులతో కట్టుదిట్టమైన భద్రత చేస్తున్నారు. అలాగే, 800 మంది కేంద్ర బలగాలు కూడా పనిచేస్తున్నాయి. ఈ ఎన్నికల్లో 58 మంది అభ్యర్థులు పోటీ చేస్తుండగా, ప్రధాన పార్టీల మధ్యే అసలైన పోరు జరుగనుంది.
అభ్యర్థులు: బీఆర్ఎస్ అభ్యర్థి మాగంటి సునీతమ్మ, కాంగ్రెస్ అభ్యర్థి మహమ్మద్ అజారుద్దీన్, బీజేపీ అభ్యర్థి పలక్ చతుర్వేది సహా ఇతర ప్రధాన అభ్యర్థులు తమ తమ పోలింగ్ బూత్లలో ఓటు వేశారు. ఈ సందర్భంగా వారు తమ విజయంపై ధీమా వ్యక్తం చేశారు.
సెలబ్రిటీలు: సినీ పరిశ్రమకు కేంద్రంగా ఉన్న జూబ్లీహిల్స్ ప్రాంతంలో ఎన్నిక జరుగుతున్నందున పలువురు సినీ ప్రముఖులు పోలింగ్ కేంద్రాల వద్ద కనిపించారు. నియోజకవర్గం పరిధిలోని షేక్ పేటలోని పోలింగ్ బూత్లో దర్శకుడు రాజమౌళి ఓటు హక్కు వినియోగించుకున్నారు. అలాగే నటుడు గోపీచంద్ సహా మరికొందరు సినీ సెలబ్రిటీలు తమ కుటుంబ సభ్యులతో కలిసి వచ్చి ఓటు వేశారు.
ఇక ప్రముఖులు ఓటు వేసిన అనంతరం మాట్లాడుతూ, ప్రతీ ఒక్కరు తమ ఓటు హక్కును వినియోగించుకోవాలని, ప్రజాస్వామ్య ప్రక్రియలో భాగస్వాములు కావాలని కోరారు. ఇక జూబ్లీహిల్స్లో పోలింగ్ ప్రక్రియ ప్రశాంతంగా కొనసాగుతోంది. ఈ ఉప ఎన్నికల ఫలితాలు నవంబర్ 14న వెలువడనున్నాయి.
