వైఎస్సార్ కాంగ్రెస్ పార్టీ అధినేత, మాజీ ముఖ్యమంత్రి వై.ఎస్. జగన్ మోహన్ రెడ్డి జన్మదిన వేడుకలను తాడేపల్లిలోని పార్టీ కేంద్ర కార్యాలయంలో పార్టీ నాయకులు, కార్యకర్తలు ఘనంగా నిర్వహించారు. ఈ కార్యక్రమంలో పాల్గొన్న పార్టీ ప్రధాన కార్యదర్శి సజ్జల రామకృష్ణారెడ్డి కేక్ కట్ చేసి జగన్కు శుభాకాంక్షలు తెలిపారు.
ఈ సందర్భంగా ఆయన మీడియా ప్రతినిధులతో మాట్లాడుతూ.. రాష్ట్ర రాజకీయాల్లో జగన్ మోహన్ రెడ్డి ఒక ధృవతార అని, సంక్షేమ పాలన అంటే ఏమిటో ఐదేళ్లలో చేసి చూపించారని కొనియాడారు. ప్రజల గుండెల్లో జగన్ స్థానం చెక్కుచెదరలేదని, ఈ వేడుకలే దానికి నిదర్శనమని ఆయన పేర్కొన్నారు.
ప్రస్తుత కూటమి ప్రభుత్వంపై సజ్జల తీవ్ర విమర్శలు చేశారు. అధికారంలోకి వచ్చి ఇన్ని నెలలు గడుస్తున్నా, ఎన్నికల మేనిఫెస్టోలో ఇచ్చిన ‘సూపర్ సిక్స్’ హామీలను అమలు చేయడంలో ప్రభుత్వం విఫలమైందని ఆయన ఆరోపించారు. ప్రజల దృష్టిని మళ్లించడానికి ప్రభుత్వం నిరంతరం రాజకీయ కక్షసాధింపు చర్యలకు పాల్పడుతోందని, అక్రమ కేసులు బనాయించడం ద్వారా ప్రతిపక్ష గళాన్ని నొక్కేయాలని చూస్తోందని మండిపడ్డారు.
జగన్ హయాంలో అమలైన సంక్షేమ పథకాలను నిలిపివేసి, పేదలకు అన్యాయం చేస్తున్నారని ఆయన ఆవేదన వ్యక్తం చేశారు. రాబోయే రోజుల్లో ప్రజలే ప్రభుత్వానికి బుద్ధి చెబుతారని, జగన్ మళ్ళీ ముఖ్యమంత్రి కావడం ఖాయమని సజ్జల ధీమా వ్యక్తం చేశారు.
రాజకీయ పరిణామాలు ఎలా ఉన్నా ప్రజల పక్షాన నిలబడటమే వైఎస్సార్ కాంగ్రెస్ పార్టీ ప్రధాన లక్ష్యం. ప్రజా క్షేత్రంలో ఉంటూ ప్రభుత్వ వైఫల్యాలను నిరంతరం ఎండగడతామని పార్టీ నేతలు స్పష్టం చేస్తున్నారు. జగన్ నాయకత్వంలో పార్టీ మరింత బలోపేతం అవుతుందని ఈ వేడుకలు చాటిచెబుతున్నాయి.
